Сельсаветы: як замагаліся са снегападам
Гудагайскі сельсавет
Падчас снегападу актыўная работа ішла ўсе дні і нават ночы. Працягваецца і цяпер: то тут, то там шчыруе снегаўборачная тэхніка.
– Дзякуй КСУП «Гудагай», – гаворыць старшыня сельсавета Уладзімір Барысевіч. – Без пагрузчыка і энерганасычанага трактара МТЗ нам не справіцца. Працуем амаль без перапынку ў гэтыя «снежныя» дні. Пастараліся расчысціць дарогі па ўсіх вёсках і пад’езды да хутароў. У Малях і Палушах дапамагло ўбраць снег РУП ЖКГ. Апошнімі расчышчалі тратуары ў пасёлку Гудагай – Ашмянскае ДЭУ-57, якое за яго адказвае, гэта зрабіла як толькі змагло.
Варнянскі сельсавет
На ўборцы снегу тут дапамагала тэхніка КСУП «Варняны» і «Гервяты», РУП ЖКГ. За вільнюскі напрамак адказвала ДЭУ-57. «Прабівала» дарогі да хутароў, якіх у сельсавеце нямала, прыватнае прадпрыемства «БелаграЗобр».
Міхалішкаўскі сельсавет
З падзякі КСУП «Міхалішкі» пачала размову старшыня Міхалішкаўскага сельсавета Кацярына Емяльян:– Яны зрабілі сапраўдную тытанічную работу, рэагавалі на кожны званок: прачысціь дарогу ці стаянку каля магазіна або аўталаўкі, праезд на хутар – не глядзелі, іх гэта дарога ці не, проста ехалі. Дзякуючы ўсім, хто дапамагаў, з наступствамі непагадзі мы справіліся – калапсу не было.
Цэнтральныя дарогі сельсавета чысціла тэхніка ДРБУ-159 і ДЭУ-57, Міхалішкаўскае лясніцтва дапамагала ў Альхоўцы і на хутарах, РУП ЖКГ актыўна вызваляла ад снегу не толькі вуліцы, за якія адказвае, але і там, дзе магло дапамагчы. Зрабіла свой унёсак і кардонная фабрыка: па патрэбе забяспечвала сельсавет тэхнікай.
– Асаблівая падзяка жыхару в. Сарочча Валерыю Завельскаму, – дадае Кацярына Емяльян. – На сваім трактары ён расчысціў не толькі ўласны двор, але і ўсю вёску.
Увогуле ж, не ўлічваючы дарожнікаў, на міхалішкаўскай зоне было задзейнічана 7 адзінак тэхнікі.
Рытанскі сельсавет
Агульнымі намаганнямі справіліся са снежнай навалай і ў Рытанскім сельсавеце.– Актыўна расчышчала дарогі, якія знаходзяцца на яе балансе, ДРБУ-159 – іх у нас нямала, – расказвае старшыня сельсавета Рыгор Цэйка. – Дапамагаў і «Амкадор» сельгастэхнікі. У аддаленых вёсках і на хутарах шчыраваў саўгас «Падольскі». На ўсе звароты насельніцтва стараліся рэагаваць хутка. Да слова, у некаторых жыхароў хутароў ёсць свае трактары – яны пракладвалі сабе дарогу самастойна.
Усяго ў Рытанскім сельсавеце працавала 6 адзінак тэхнікі.
Гервяцкі сельсавет
справіўся са снегам у першыя суткі.– Мы ўжо двойчы ўсюды праехалі, – паведаміў старшыня сельсавета Руслан Сачко. – Спачатку расчысцілі асноўныя напрамкі, затым прайшлі больш дасканала. Дайшлі да ўсіх хутароў. Цяпер працуем па тэлефанаваннях ад людзей.
Але і сёння работы хапае: па просьбе жыхароў ідзе расчыстка пад’ездаў да могілак.
Справіцца са снегападам сельсавету дапамагала КСУП «Гервяты», якое на гэтыя патрэбы выдзеліла 5 адзінак тэхнікі – трактары і «Амкадоры». Руслан Мікалаевіч адзначыў, што сувязь з сельгаспрадпрыемствам была наладжана на высокім узроўні. Намеснік дырэктара КСУП Аляксандр Кавалька рэагаваў па першым званку, трактарысты, што працавалі на ўборцы снегу, таксама.
Подписывайтесь на телеграм-канал «Островецкая правда» по короткой ссылке https://t.me/ostrovetsby.
Телеграм-канал «Островецкая правда» – всё самое интересное из жизни Островца и Островецкого района.
