Рэцэптам куліча дзеліцца Лідзія Лакевіч
1
Падзяліцца рэцэптам куліча мы папрасілі гаспадыню са стажам Лідзію Аляксандраўну ЛАКЕВІЧ.
Перад святам, звычайна ў пятніцу, мама пякла ў печы булкі. Пах стаяў на ўсю хату, здавалася, нават на вуліцу водар прасочваўся! У чырвоную суботу фарбавалі яйкі – звычайна адварам шалупіння цыбулі, – больш у гэты дзень нічога не рабілі. У нядзелю бацькі ішлі на Усяночную. Раніцай накрывалі стол, на якім, акрамя пасхі і куліча, абавязкова была асвечаная ежа, хрэн, сыр, запечаны ў цесце кумпяк, дамашнія каўбаскі. Традыцыі хадзіць «у жакі» ў нас не было: дзеці з дому выносілі яйкі, качалі, біліся імі. На Вялікдзень кожны з сямейнікаў абавязкова апранаў новую рэч: чаравічкі, сукенку ці кашулю. Балазе, мама была майстрыхай на ўсе рукі – і на свята кожны з нас быў у абноўцы.
Пасхальны куліч
Рошчына: 1,5 шклянкі малака, 50 гр свежых дрожджаў, 250 гр сметанковага масла, 1 кг мукі, 6 яек, 1 шклянка разынак, 1,5 шклянкі цукру, 0,5 чайнай лыжкі солі, 1 сталовая лыжка каньяку (не абавязкова), 2 гр ваніліна, алей для змазкі формы.
Глазура: 0,5 шклянкі цукровай пудры, 1 яечны бялок, кандытарская пасыпка.
1. Для рошчыны ў цёплым малацэ раствараем 2 сталовыя лыжкі цукру, дрожджы і 6 сталовых лыжак мукі. Усё старанна змешваем і пакідаем у цёплым месцы на некалькі гадзін.
2. Калі рошчына падымецца, дадаём астатнія папярэдне перамешаныя сметанковае масла, яйкі, цукар і астатнія інгрэдыенты. Цеста старанна вымешваем і даём яму «адпачыць».
3. Калі цеста крыху падышло, вымешваем яго яшчэ раз і пакідаем «расці», пакуль яно ўдвая, а то і ўтрая не павялічыцца ў памерах.
4. Формы для выпякання змазваем алеем і на трэць запаўняем цестам – падчас выпякання яно яшчэ падрасце.
5. Выпякаем 30-35 хвілін у духоўцы пры 180 градусах.
6. Пакуль кулічы растуць і падрумяньваюцца, самы час падрыхтаваць глазуру. Палову шклянкі цукарнай пудры і адзін бялок узбіваем да густой белай пены.
7. На гарачыя кулічы наносім бялковую глазуру і ўпрыгожваем рознакаляровай пасыпкай.
Кулінарныя хітрыкі
* Для куліча, як і для любога дражджавога цеста, муку абавязкова прасеяць праз сіта, каб цеста насычалася кіслародам, – булкі будуць больш пругкімі і лёгкімі.
* Заўсёды дадавайце ў цеста соль, нават калі з яго будуць зроблены салодкія пірагі. Дробка солі паляпшае якасць цеста: выпечка лепш трымае форму.
