Падведзены вынікі конкурсу на лепшае навагодняе ўбранства

Навагоднія і калядныя святы практычна кожная арганізацыя, прадпрыемства, сям’я хочуць сустрэць асабліва – ярка, прыгожа, незвычайна. Некаторыя праяўляюць у гэтай справе незвычайны крэатыў і творчасць. Каб па вартасці ацаніць і адзначыць іх намаганні па ўпрыгожванню да свята нашага агульнага дома – горада і вёсак, дзе мы жывём, раённы выканаўчы камітэт аб’явіў конкурс на лепшае навагодняе афармленне будынкаў і прылягаючых тэрыторый. Напярэдадні Новага года былі падведзены вынікі гэтага конкурсу.

Вынікі конкурсу

У намінацыі “Лепшае навагодняе афармленне арганізацыі, установы, прадпрыемства дзяржаўнай формы ўласнасці горада Астраўца

Першае месца – Установа аховы здароўя “Астравецкая цэнтральная раённая бальніца”

Другое месца – Дарожнае рамонтна-будаўнічае ўпраўленне №159

Трэцяе месца – дзяржаўнае лесагаспадарчае прадпрыемства “Астравецкі лясгас”

У намінацыі “Лепшае навагодняе афармленне арганізацый, прадпрыемстваў, устаноў Астравецкага раёна

Першае месца – КСУП “Гервяты”

Другое места – Міхалішкаўскі сельвыканкам

Трэцяе месца – Рытанскі сельвыканкам

У намінацыі “Лепшае навагодняе афармленне прыватнага домаўладання”

Першае месца –Тарэса Мацвееўна Мароз, (г. Астравец)

Другое месца –Алена Генрыхаўна Ярашэвіч (пас. Гудагай)

Трэцяе месца падзялілі Наталля Іванаўна Янкойць (аг. Страчанка) і Вікторыя Іванаўна Лаўрыновіч (г. Астравец)

У намінацыі “Лепшае афармленне навагодняй ёлкі”

Першае месца – аддзел па кінавідэабслугоўванню дзяржаўнай установы “Астравецкі цэнтр культуры і народнай творчасці”

Другое месца – дзіцячая школа мастацтваў

Трэцяе месца – СШ №1 Астраўца

У намінацыі “Лепшае афармленне арганізацый і прадпрыемстваў недзяржаўнай формы ўласнасці, індывідуальных прадпрымальнікаў конкурс не адбыўся: на яго не паступіла заявак.

   Пракаменціраваць вынікі конкурсу і ўвогуле навагодняе афармленне горада і раёна мы папрасілі намесніка старшыні райвыканкама Віктара Збігневіча Свілу.

– Распрацоўваючы план навагодняга ўпрыгожвання Астраўца, мы ўмоўна падзялілі горад на пяць зон: цэнтральную – плошча, сквер і прылягаючыя да іх тэрыторыі і ўсе чатыры ўезды ў Астравец. Хацелася, каб усе яны былі аформлены ў адзіным стылі.

Не магу сказаць, што задума ажыццявілася поўнасцю – але многае было зроблена. Пераход розных зон і аднастылёвасць нясуць на аднатыпныя каляровыя кансолі -- пра гэта, як і пра ўпрыгожванне цэнтральнай гарадской ёлкі і цэнтра горада, паклапаціўся камунгас. Але не толькі – многія арганізацыі таксама ўдала ўпісаліся ў агульны святочны малюнак. У прыватнасці, хочацца адзначыць Белаграпарамбанк, раённы вузел паштовай сувязі.

З уезду з боку Смаргоні перш за ўсё прыцягвае ўвагу прадстаўніцтва Белдзяржастраху, затым зачароўваюць прыгожым і густоўным убраннем будынкі лясгаса і ДРБУ-159. Скажу шчыра: цяжка было выбраць, які з іх аформлены лепш.

На дарозе з боку Маляў самае яркая – і, на жаль, практычна адзіная яркая “пляма” – раённы Дом культуры “Галактыка”.

На уездзе ў Астравец з Гудагая у вочы кідацца святочна ўпрыгожаны будынак райсельсгастэхнікі. Сваю лепту у агульную карціну ўносяць будынкі РАНС, РАУС, цэнтра сацыяльнага абслугоўвання насельніцтва.

З боку будучага цэнтральнага мікрараёна самыя яркія і святочныя будынкі – пераможцы конкурсу цэнтральная раённай бальніцы. Цудоўна аформлена і аптэка.

На жаль, прызавых месцаў у конкурсе толькі тры, і немагчыма адзначыць усіх, хто праявіў фантазію і старанне ў афармленні сваіх тэрыторый – хацелася б адзначыць адміністрацыйны будынак “Белтэхаагляду”, каля якога з’явілася ззяючая карэта, незвычайнае афармленне СШ №1. Невялікія арганізацыі – рэдакцыя раённай газеты, падатковая інспекцыя, упраўленні капітальнага будаўніцтва, сельскай гаспадаркі, сацыяльнага абслугоўвання насельніцтва – таксама пастараліся годна прадставіць святочнае ўбранства сваіх офісаў

Што тычыцца прыватных падвор’яў, дамоў і кватэр, то іх святочна прыбралі многія астраўчане і жыхары раёна – але на конкурс было пададзена толькі чатыры заяўкі: усе дастойныя. Але першае месца без варыянтаў было аддадзена Тарэсе Мацвееўне Мароз, дзе ва ўсім афармленні дома і сядзібы вытрымана калядная тэматыка.

Шчыра кажучы, крыху расчаравалі нашы прадпрымальнікі, якія не толькі не падалі заявак на конкурс, але і не асабліва парупіліся пра навагодняе ўбранства сваіх офісаў і гандлёвых кропак.

Увогуле ж, думаю, са мной пагодзяцца астраўчане і госці горада: сёлетні навагодні Астравец, ды і вёскі таксама, значна папрыгажэлі і пахарашэлі нават у параўнанні з мінулым годам – трэба адзначыць, што дзякуючы нашым агульным намаганням.