Островецкие ветераны демонстрировали своё творчество

Ідэя сабраць у клубе людзей шаноўнага ўзросту з мастацкімі здольнасцямі нарадзілася адразу пасля сёлетняга фестывалю творчасці ветэранаў. Тады ў фае канцэртнай залы “Астравец” працавала даволі прадстаўнічая выстава мастацкай творчасці пенсіянераў, але далёка не ўсе ўмельцы адважыліся паказаць свае напрацоўкі. Таму варта было чакаць працягу.

І вось супрацоўнікі цэнтральнай раённай бібліятэкі прымаюць гасцей, а чытальная зала спакваля ператвараецца ў выставачную. Прычым свае экспанаты прадставілі не толькі самадзейныя, але і прызнаныя майстры – чараўніца залатой саломкі, першы народны майстар на Астравеччыне Валянціна Вільеўна Віннічак і мастачка, якой, здаецца, падуладны любы прыродны матэрыял, – Ніна Іосіфаўна Мілаш. Жаданым госцем стала дырэктар раённага Дома рамёстваў Тамара Іванаўна Гаваноўская, якая змагла па вартасці ацаніць творы самадзейных мастачак і запрасіла да супрацоўніцтва.
А потым з падачы Дануты Францаўны Чарнушэвіч, нязменнай вядучай ветэранскіх свят, пачалася прэзентацыя – ды не простая, а з майстар-класамі. Як жа ўцерпіш і не паспрабуеш сам рабіць нарыхтоўкі са старых газет для пляцення розных кошычкаў, вазачак, конавак, калі майстрыха Ванда Іосіфаўна Лосева так шчыра падахвочвае і нават паказвае ў дробязях “вытворчыя” прыёмы? Зразумела, першай узялася за “экзотыку” Ніна Іосіфаўна Мілаш – яе прага пазнавання навізны, падобна, усё яшчэ не натоленая. Сама ж яна прапанавала далучыцца да свайго мастацтва – лазапляцення, абяцала падтрымку і навучанне, але майстрыхі пакуль у роздуме. Што ж, лаза – матэрыял складаны, не кожнаму і не адразу падасца.
Па вартасці ацанілі заўсёдніцы клуба – вядома ж, жанчыны! – вязаныя ўборы Марыі Іванаўны Дземяшкевіч і Алены Аляксандраўны Качан, вясёлкавыя вышываныя навалачкі для канапных падушак і вязаныя дзіцячыя каптурыкі Таісы Рыгораўны Папяльніцкай, арыгінальныя вязаныя сурвэткі Галіны Архіпаўны Вайцяхоўскай, Ірыны Антонаўны Стэх і касынку Любові Аляксееўны Падалянчык, створаныя чароўнай іголкай і каляровымі ніткамі карціны Святланы Іванаўны Мешкіс і арыгінальныя пано з падручнага матэрыялу Ніны Арсеньеўны Шчэрбань… Усяго не пералічыць, ды і не варта. Каб пагадзіцца з ацэнкай, гэты рукатворны цуд трэба бачыць. На падобных выставах творчасці ветэранаў не можа не ўразіць разнастайнасць экспанатаў, творчых манер і густаў. Ветэраны – гэта пакаленне нястомных у працы людзей, якіх само жыццё навучыла многае ўмець і рабіць, каб забяспечыць свой побыт. Рукадзельнічаць усе гэтыя майстрыхі пачыналі ў раннім дзяцінстве, спрабавалі сябе ў розных відах творчасці і дасягнулі вяршынь майстэрства.
А Капіталіна Цімафееўна Пятроўская – майстрыха прыпевак, што і прадэманстравала ў чарговы раз, расквеціла імпрэзу агністымі куплетамі ўласнага сачынення і “сарвала” авацыі.
Творчыя пасядзелкі завяршыліся, па традыцыі – частаваннем духмя най травяной гарбатай ад Галіны Архіпаўны Вайцяхоўскай з салодкімі прысмакамі. Усе майстрыхі атрымалі маленькія сувеніры на добрую згадку.

-------------------------------------------
Тэкст і фота Таісы СЯМЁНАВАЙ.