Жатва – дело общее, или Как проходит уборка в КСУП «Гервяты»

09:00 / 31.07.2026

Бітва за ўраджай – гэтым улюблёным журналістамі штампам найлепш можна апісаць сёлетнее жніво, тэмпы якога стрымлівае дажджлівае надвор’е. Кампанія з разраду стратэгічных і архіважных: ад яе паспяховасці залежыць не толькі харчовая бяспека краіны, але і наша агульнае заўтра. Жніво стала яднальнай сілай, якая моцна згуртавала беларусаў: мне здаецца, што няма таго чалавека, які душой не хварэў бы за ўраджай...

У гэтым сезоне, як і летась, камбайнеры ў КСУП «Гервяты» выкарыстоўваюць, без перабольшвання, кожную хвіліну для абмалоту. Праўда, у дзень, калі прыязджала рабіць рэпартаж, пасля налётчыкаў-дажджоў яны на некаторы час спынялі свае хлебаўборачныя машыны, каб збажына абсохла. Жаць вільготную – свядома траціць ураджай…

Пяты сезон на ўборцы камбайнеру Андрэю Вінцкусю дапамагае Іван Барадынка з Белдзяржстраха. Хоць іх «Джон-Дзір» ужо смела можна назваць пенсіянерам (на рахунку 20 уборак!), але майстэрства і старанне працаўнікоў бяруць сваё і літаральна штогод выводзяць экіпаж на першыя пазіцыі раённага табеля лідараў жніва. Летась гэты тандэм першым у раёне намалаціў 2 тысячы тон збожжа.

Нягледзячы на тое што ўборку ўскладняюць дажджы, Андрэй і Іван не трацяць аптымізму і ў адзін голас запэўніваюць:

– Убяром да апошняга каласка!

Дарэчы, на жніве гервятцам дапамагаюць працаўнікі розных прадпрыемстваў і арганізацый, многія – не першы год.

У пары тут працуюць родныя браты Андрэй і Кірыл Масевічы. На падмогу першы прыйшоў з «Радыёдэталі», другі – з раённага аддзела па надзвычайных сітуацыях. Абодва, можна сказаць, патомныя камбайнеры.

– І я, і Кірыл пачыналі з бацькам у якасці памочніка. Тата шмат гадоў абмалочваў гервяцкія нівы. Цяпер, хоць і на заслужаным адпачынку, але працуе ў мясцовай гаспадарцы. Таму жніво – наша сямейная справа, – усміхнуўся Андрэй.

Да размовы далучыўся Кірыл:

– Ведаеце, работа камбайнера ў пэўным сэнсе нагадвае работу выратавальніка. Як пажарны змагаецца з агнём, так і механізатар стараецца вырваць у дажджлівага надвор’я пагодлівыя дні.

Відавочна, сёлета «бітва» за хлеб пакуль вельмі энергазатратная, бо асноўны цяжар і адказнасць кладуцца на плечы зернесушыльшчыкаў. Значэнне на сёлетняй уборцы зернесушыльных комплексаў стратэгічнае. Жніво даўно перастала быць проста працэсам зразання каласкоў у полі. Без эфектыўнай інфраструктуры, пасляўборачнай апрацоўкі нават самы вялікі ўраджай, сабраны высокатэхналагічнымі камбайнамі, змарнуецца і сапсуецца…

На цэнтральным насенным зернескладзе КСУП «Гервяты» работа спорылася. Хоць ля сушылак і былі невялікія залежы збожжа, але яно было накрыта. За суткі тут даводзяць да кандыцыі да 400 тон. Нават калі дажджыць, работа не спыняецца.

У тэму

На тэрыторыі зернесклада сустрэлі старшыню Гродзенскага аблвыканама Юрыя Караева, яго першага намесніка Сяргея Мядзвецкаса і памочніка Прэзідэнта – інспектара па Гродзенскай вобласці Канстанціна Бурака. Кіраўніцтва вобласці пастаянна трымае руку на пульсе ўборкі, больш таго, яе ход знаходзіцца на асабістым кантролі губернатара. Нягледзячы на шчыльны графік, занятасць і пастаянныя рабочыя паездкі ў розныя гаспадаркі вобласці, Юрый Хаджымуратавіч ахвотна пракаментаваў журналістам уборку.

– На жаль, ідуць дажджы. Толькі сёння (на 27 ліпеня – Заўв. аўт.) у вашым раёне за гэтую частку дня ападкі выпалі ў трох гаспадарках. Камбайны стаяць у полі ў чаканні, калі аграном, папярэдне вымераўшы вільготнасць зерня, дасць дабро на ўборку. Важна не толькі ўбраць, а зрабіць гэта якасна і без страт. На месцах аграномы і дырэктары праяўляюць сапраўднае майстэрства, стараюцца і знаходзяць аптымальнае выйсце. Праверыў у сладах новы ўраджай. Паўсюль дапушчальная вільготнасць, збожжа ў вельмі добрым стане. Працуюць зернесушыльныя комплексы – і айчынны «ЛідАрай», польская М-819, а людзі зараджаны на работу».