Сёлета са школай развітваецца 206 адзінаццацікласнікаў Астравеччыны

14:00 / 12.06.2026

Здаецца, яшчэ ўчора гэтыя прыгожыя дзяўчаты і мужныя юнакі былі нясмелымі першакласнікамі, якія з хваляваннем рабілі першыя крокі ў школьнае жыццё. Яны не толькі вучыліся чытаць і пісаць, але і адкрывалі таямніцы мацерыкоў і далёкіх планет… Дзякуючы таленавітым і ўсёй душой адданым абранай справе настаўнікам атрымлівалі глыбокія і трывалыя веды.

А яшчэ школьная пара навучыла іх цаніць вернасць сяброў і берагчы першае трапяткое каханне… Час прамінуў хутка – і сёння яны выпускнікі.

Гэты чэрвеньскі баль назаўсёды застанецца ў памяці выпускнікоў і іх бацькоў як апошні акорд школьнага жыцця. Звыклы званок на ўрок змяніўся мелодыяй урачыстага вальса, а дзяцінства саступіла дарогу юнацтву. Ззаду засталося самае напружанае і складанае – хваляванне перад экзаменамі і тэсціраваннем, нервовае чаканне вынікаў і радаснае «Ура!» ці засмучанае «Крыху не хапіла…»

Больш не трэба спяшацца ў школу. Настаўнікі ўжо паставілі фінальныя адзнакі, а галоўны экзамен пад назвай «Жыццё» толькі пачынаецца… Выдыхайце, усміхайцеся, радуйцеся – вы годна прайшлі гэты этап…

Глядзіце ў заўтрашні дзень з цікавасцю да ўсяго новага і з упэўненасцю ў сваіх сілах – перад вамі адкрыты ўсе дарогі. Спрабуйце, смела штурмуйце абраны ўніверсітэт ці каледж і памятайце: у вас абавязкова ўсё атрымаецца.

Але кім бы вы ні сталі і куды б вас ні прывялі дарогі лёсу, у любой жыццёвай сітуацыі заставайцеся людзьмі – шчырымі, сумленнымі, прыстойнымі. І заўсёды памятайце і зберагайце ў закуточках сэрца тое месца, адкуль усё пачалося і дзе вас заўсёды чакаюць…

У добры шлях, дарагія выпускнікі!