Как в лесхозе поддерживают пенсионеров, развивают питомник и экологический туризм, узнали активисты райсовета ветеранов

Патрэбнае з прыемным і карысным удала ўмеюць сумяшчаць астраўчане паважанага ўзросту. Чарговае пасяджэнне прэзідыума савета ветэранаў адбылося на базе Астравецкага вопытнага лясгаса. Актывісты гэтай грамадскай арганізацыі не толькі абмеркавалі надзённыя справы і пытанні, але і акрэслілі планы на бліжэйшую будучыню. А яшчэ ветранаў працы чакала насычаная пазнавальная экскурсія па найбольш адметных аб’ектах лесагаспадарчай установы.

– Астравецкі лясгас – адно з самых паспяховых прадпрыемстваў, якое дынамічна развіваецца, дзе клапоцяцца не толькі пра нарошчванне прамысловасці і развіцця эканомікі, але і пра дабрабыт работнікаў, у тым ліку і былых, – адкрываючы пасяджэнне, зазначыла старшыня раённага савета ветэранаў Ірына Шляхтун. – Лес – гэта гэта наша багацце, прыгажосць, працоўныя месцы, у рэшце – радзіма.

На парадак дня было вынесена некалькі планавых пытанняў: практыка работы адміністрацыі і ветэранскай арганізацыі лясгаса, правядзенне справаздачна-выбарных канферэнцый у пярвічках, удзел ветэранаў працы ва ўборачнай кампаніі бягучага года. Таксама члены прэзідыума разгледзелі, унеслі прапановы і падзяліліся вопытам удзелу ў штогадовай дабрачыннай акцыі “Збяром дзяцей у школу”, а таксама абмеркавалі правядзенне 15-й юбілейнай дэкады “Залаты ўзрост”, прысвечанай Дню пажылога чалавека.

***

Мне здаецца, што цеснае і плённае ўзаемадзейнічанне адміністрацыі лясгаса, яго прафсаюзнай пярвічкі і ветэранскай арганізацыі – узорнае і больш таго, паказальнае для астатніх, якое варта пераймаць і іншым прадпрыемствам раёна. Пра гэта, дарэчы, мне здаецца, сведчаць і даклады выступаючых.

Намеснік дырэктара па ідэалагічнай рабоце Віталь Шарэйка зрабіў невялікі экскурс ў гісторыю стварэння Астравецкага лясгаса, а таксама абмаляваў яго дзейнасць:

– У склад лясгаса уваходзіць 9 лясніцтваў, дрэваапрацоўчы цэх, лесагадавальнік, лесапаляўнічая гаспадарка, станцыя пагрузкі вагонаў, лесапункт. У нас працуе 436 чалавек. Галоўнае багацце прадпрыемства – лясы, а галоўны гонар – людзі, якія гадуюць, захоўваюць і прымнажаюць гэтыя багацці. Астравецкі вопытны лясгас выконвае ўсе паказчыкі сацыяльна-эканамічнага развіцця; у поўным аб’ёме праводзім лесаахоўныя і супрацьпажарныя мерапрыемствы. З кожным годам павялічваецця доля спелых і падспяваючых лясоў; расце колькасць дзічыны; рэгулярна перавыконваюцца заданні па лесааднаўленні. Традыцыйна праводзім акцыі: вясной – “Тыдзень лесу”, “Дай лесу новае жыццё”, восенню – “Чысты лес”, “Адновім лясы разам”. У іх пастаянна ўдзельнічаюць усе жадаючыя, у тым ліку ветэраны.

Вялікую ўвагу надаём фарміраванню здаровай маральна-псіхалагічнай абстаноўцы ў калектыве, павышэнню грамадска-палітычнай і працоўнай актыўнасці работнікаў. Гэта дасягаецца дзякуючы правядзенню шматлікіх карпаратыўных мерапрыемстваў: навагодніх ранішнікаў, турыстычных злётаў, спаборніцтваў па лоўлі рыбы і сярод вальшчыкаў лесу, сплаваў на байдарках, паездак на хакейныя матчы клуба “Дынама-Мінск”.

У нашым лясгасе не забываюць і пра ветэранаў працы. Так, у 2023 годзе ўрачыста адкрылі памятную дошку ў гонар заслужанага лесавода БССР Мікалая Пятровіча Кажамякіна, які адпрацаваў ляснічым 1-га класа с 1953 па 1985 гады. Таксама арганізоўваем выязныя ўшанаванні пенсіянераў-юбіляраў. Для ўсіх ветэранаў за кошт лясгаса арганізавана падпіска “Лясной газеты”, акрамя гэтага, тыя, у каго вялікі стаж работы ў галіне, атрымліваюць “раёнку” і “Гродзенскую праўду”.

Пра сацыяльныя гарантыі і льготы для ветэранаў раённай лясной галіны падрабязна і з прыкладамі расказаў старшыня прафсаюзнага камітэта Юрый Касцюкевіч. Да слова, менавіта яго выступленне выклікала ў прысутных найбольшы інтарэс.

Зазначу, што ўсе працаўнікі лясгаса і яго структурных падраздзяленняў пасля выхаду на заслужаны адпачынак, застаюцца на прафсаюзным уліку і на іх распаўсюджваюцца ўсе палажэнні калектыўнага дагавора.

Бонусы для пенсіянераў – ад наймальніка і прафкама

1) Магчымасць заказаць 7 кубаметраў дроў на ільготных умовах (сніжка 50%). Летась з’явілася новаўвядзенне: можна выпісаць і пасечаныя дровы (для людзей пенсійнага ўзросту такі варыянт нават больш зручны). Іх пагрузка, разгузка і дастаўка для ветэранаў працы бясплатныя.

2) У выпадку няшчасных і непрадбачаных жыццёвых акалічнасцей, трагічных падзей аказваецца матэрыяльная дапамога ў памеры не менш за 10 базавых велічынь.

3) Таксама можна звярнуцца да наймальніка з просьбай аказаць матэрыяльную дапамогу ў сувязі з працяглай хваробай, лячэннем, складаным матэрыяльным становішчам.

4) Усе члены прафсаюзнай пярвічкі штогод атрымліваюць матэрыяльную дапамогу да Новага года, Дня абаронцаў краіны, 8 Сакавіка, Дня Незалежнасці, Дня работнікаў лесу, Дня пажылых людзей, Дня маці, бацькі, Дня інвалідаў. Падкрэслю, што сярод лесагаспадарчых устаноў вобласці дапамогу да гэтых святаў пенсіянерам аказвае толькі Астравецкі вопытны лясгас.

5) Адно з новаўвядзенняў, якое неўзабаве з’явіцца ў калектыўным дагаворы (згодна з Тарыфным пагадненнем паміж Мінлясгасам і галіновым прафсаюзам), – гэта штомесячная даплата былым кіраўнікам, якія ўнеслі значны ўклад у равіццё лясной гаспадаркі. Яе памер залежыць ад стажу работы і складае ад 10-ці да 20-ці базавых велічынь.

6) Пры выхадзе на пенсію работнік атрымлівае дапамогу, размер якой залежыць ад стажу работы ў лясной галіне і ў арганізацыі. Напрыклад, той, хто адпрацаваў звыш 30-ці гадоў, атрымае 6 сярэднямесячных зарплат.

7) На песіянераў распаўсюджваюцца ўсе льготы, якія тычацца адпачынку, лячэння і аздараўлення ў прафсаюзных санаторыях. Расходы на набыццё пуцёвак кампенсуе наймальнік (10 базавых велічынь), прафкам (5 БВ), абкам (70 рублёў).

8) Прадугледжана аплата са сродкаў прафкама 4-х наведванняў у месяц басейна, трэнажорнай залы ў фізкультурна-аздараўленчым комплексе і САК “Імпульс”.

9) Пры прад’яўленні падцвярджаючых дакументаў кампесуюцца расходы на набыццё лекаў, медыцынскіх прэпаратаў на суму да 15 базавых велічынь.

Пётр Крупеньчык, старшыня ветэранскай арганізацыі лясгаса:

– І што дадаць, пасля такіх ёмкіх выступленняў калег? (Усміхаецца.) Калі сур’ёзна, то мне пашчасціла працаваць у такім цудоўным калектыве.

З нашага лясгасу выйшла тры Заслужаных лесавода БССР – Мікалай Кажамякін, Аляксандр Буй, Аляксандр Пахомаў. Многія з новага пакалення працаўнікоў пайшлі ад нас на павышэнне: Яўген Волкаў, Канстанцін Дзісько, Аляксандр Шостак, Андрэй Шыкавец.

Толькі станоўчыя і добрыя водгукі магу накіраваць адміністрацыі і прафсаюзнаму камітэту. Рыгор Мечыслававіч моцна падтрымлівае сваіх людзей, у тым ліку былых работнікаў: нездарма калетыўны дагавор Астравецкага лясгаса ў свой час прызналі лепшым у нашай галіне.

ЛІЧБА

94 пенсіянера стаіць на ўліку ў пярвічнай ветэранскай арганізацыі лясгаса, у тым ліку 15 яшчэ працуюць.

***

Выязное пасяджэнне прэзідыума савета ветэранаў працягнула экскурсія па найбольш цікавых вытворчых аб’ектах лясгаса. У гадавальніку, які традыцыйна ўваходзіць у топ-15 лепшых з 94-х падобных аб’ектаў краіны, актывісты наведалі пляцоўкі для вырочшвання пасадачнага матэрыялу і ўнікальны дэндрапарк, даведаліся, якія хвойныя, ліставыя, а таксама дэкаратыўныя дрэвы і кусты тут вырошчваюць. Аказваецца, цяпер можна набыць лаванду, чабор, шалфей і іншыя прыгожыя для ўпрыгожвання падворка расліны. Асабліва гасцей уразіў майстар-клас ад начальніка лесагадавальніка Таццяны Андрушойць па тапіары. У вальернай гаспадарцы ўдзельнікі ўвачавідкі ўбачылі грацыёзных ланяў і плямістых аленяў, а завяршыўся прадуктыўны дзень чаяпіццем гарбаты ў адным з самых маляўнічых куточкаў Астравеччыны – доме паляўнічага ў Задворніках.