Рэдакцыя газеты “Астравецкая праўда” аб’яўляе конкурс “Дзедаўская прылада”
Кажуць, новае – гэта добра забытае старое. У розныя часы ў «Астравецкай праўдзе» праводзіліся розныя конкурсы, імгненныя і доўгаіграючыя. Ужо і не ўзгадаць усе, як і іх пераможцаў.
І ўсё ж час ад часу чытачы ўспамінаюць некаторыя з іх. У прыватнасці, фотаконкурс «Дзедаўская прылада», які праводзіў у рамках свайго праекта «Сядзіба» Эдуард Свірыд. І конкурс «Пазнай Астравеччыну», які праходзіў на працягу 2020 года і ў якім удзельнікі не толькі пазнавалі знакамітыя мясціны роднага краю, але і расказвалі пра іх, дапаўняючы расповеды новымі фотаздымкамі і відэа. Матэрыялы пазней склалі аснову кнігі «Астравеччына вядомая і незнаёмая».
У новым конкурсе мы вырашылі іх аб’яднаць. Ад першага ўзялі назву і сутнасць: удзельнікам трэба будзе здагадацца (пазнаць, даведацца, высветліць), што за старадаўняя прылада змешчана на фотаздымку. Ад другога конкурсу мы ўзялі яго ўмовы.
Новы конкурс пачынаецца ў сённяшнім нумары газеты – вельмі сімвалічна, што ён прысвечаны Дню Незалежнасці нашай краіны – і прадоўжыцца да канца года.
Кожную пятніцу мы будзем змяшчаць фотаздымак якой-небудзь старадаўняй прылады працы.
У кожным туры, правільна адказаўшы на заданне, удзельнікі могуць набраць некалькі балаў. Тыя, хто адкажа, што гэта, атрымае 1 бал.
Дадатковыя балы будуць налічвацца тым, хто раскажа, як гэтай прыладай карыстацца, прыгадае цікавыя гісторыі, анекдоты, прыказкі і прымаўкі, казкі, паданні, звязаныя з ёй. А найвышэйшы пілатаж – калі чытачы дашлюць відэа, у якім пакажуць, як яны асвоілі гэтую прыладу (дзе яе ўзяць – гэта ўжо іншае пытанне, адказ на якое павінны знайсці самі ўдзельнікі конкурсу).
Правільны адказ на пытанне і наступнае заданне з’явяцца на старонках «Астравецкай праўды», на нашым сайце і ў суполках «АП» у сацыяльных сетках праз тыдзень.
Тыя ўдзельнікі конкурсу, якія набяруць найбольшую колькасць балаў, і стануць пераможцамі конкурсу. Вынікі яго будуць падведзены напярэдадні Новага года.
Адказы на пытанні можна
паведамляць па нумары 73-3-64 (спытаць Ніну Рыбік), дасылаць
на звычайную (г. Астравец,
вул. Энгельса, 2А) ці электронную (ostrov_red@ostrovets.by) пошту.
…Часта нашых продкаў уяўляюць цёмнымі, забітымі, недалёкімі. А калі бачыш, якія прылады яны прыдумлялі, каб аблегчыць сваю працу і быт, дзіву даешся: якія яны былі разумныя, вынаходлівыя, майстравітыя!
Спадзяёмся, што ў гэтым пераканаюцца ўсе, хто прыме ўдзел у конкурсе «Дзедаўская прылада», і тыя, хто будзе сачыць за ім.
Удачы і цікавых уражанняў!
І першае заданне: што за прыладу вы бачыце на здымку?
