Наши дети: как меняются приоритеты и что считают самым важным в жизни
15:00 / 01.06.2025
Нашы юныя сябры расказалі пра:
- * галоўныя каштоўнасці;
- * сяброўства;
- * мары;
- * інтарэсы;
*Сяброўства – гэта калі ты разам гуляеш і маеш добрыя стасункі з іншымі людзьмі: не сварыцеся, не крыўдзіце адзін аднаго. Лепшыя сябры ў нас з’яўляюцца з маленькіх гадоў (3-4-х), пазнаёміліся ў дзіцячым садку – і разам усё жыццё. З часам такі чалавек стане табе як родны, і ўсімі сакрэцікамі з ім падзелішся, бо давяраеш.
У мяне ўжо вымалёўваюцца такія сябры. З імі прыемна бавіць час, нам аднолькавыя гульні падабаюцца.
*Некаторыя нашы жаданні называюцца марамі – гэта калі ты доўга пра што-небудзь думаеш.
Большасць дарослых хочуць добрую работу і мець шмат грошай, дзеці – «8», «9» і «10» у дзённіку. А я хачу, калі вырасту, здаць на правы і купіць машыну.
Калі нечага моцна хочацца, трэба марыць, пастаянна думаць і яшчэ глядзець на карцінку з яе выявай, уяўляючы, што хутка жаданае з’явіцца. Можна, канешне, паспрабаваць і самому ажыццявіць мару – тут шанс 50 на 50, а калі пашчасціць, то дапамогуць людзі, у якіх усё атрымліваецца паспяхова.
*Думаю, усе дзеці любяць гуляць: у даганялкі і катацца на веласіпедзе. А ўвогуле ў кожнага свой інтарэс, ад гэтага залежыць, колькі народу будзе гуляць разам з табой. Напрыклад, калі ў чалавека не атрымліваецца перамагчы, то занятак яму падабацца не будзе. Забаўкі прыдуманы для душы, каб весела праводзіць час.
Косця Талуць, 15 гадоў
Калі гаварыць пра мае прыярытэты, то пачатак ланцужка выглядае так: бацькі, я, мае інтарэсы.
*Сяброўства – гэта ўзаемапрыемныя стасункі, дзе ёсць падтрымка, агульныя інтарэсы. Лічу, трэба адрозніваць паняцці: сябар – знаёмы, прыяцель, а лепшаму сябру можна даверыць сакрэты, ён гатовы прыйсці на дапамогу ў любы момант, адкласці свае справы на другі план дзеля цябе.
Не ведаю, колькі сяброў можа быць у чалавека, у мяне, напрыклад, іх няшмат і ўсе з дзяцінства.
*Параўнаў бы мару з пуцяводнай зоркай: мы кіруемся ёй, каб дасягнуць жаданага. Ёсць мары розныя: нерэальныя і больш прыземленыя. Аднак калі прыдумаў сабе неспраўджальнае і стараешся ўвасобіць у жыццё, гэта дапаможа рухацца наперад, развівацца, спазнаваць новае.
Хочаш нечага – дасягай сам, не чакай, што за цябе хтосьці зробіць ці само чароўным чынам адбудзецца. Гэта толькі ў дзяцінстве з’яўляюцца добрыя чараўнікі, ролю якіх іграюць бацькі, і выконваюць асобныя «хацелкі». (Смяецца.)
У большасці людзі мараць матэрыяльна, пра што канкрэтна, не назаву – усё залежыць ад цікавасцей і патрэб. Што тычыцца мяне, то пакуль складаю толькі планы.
*Большасць хлопцаў цікавіць спорт.
Увогуле інтарэсы чалавека залежаць ад яго магчымасцей – унутранага патэнцыялу, фінансавы бок мае значэнне. Значную ролю іграе падтрымка.
Без хобі цяжка жыць, бо цікавасці разнастайваюць жыццё і з’яўляюцца своеасаблівым адпачынкам. Калі не ведаеш, што табе па душы, проста трэба паспрабаць сябе ў розных сферах. А калі зоркі сыходзяцца, то любімая справа можа стаць прафесіяй.
Аня Матох, 6 гадоў
Самае галоўнае – мець сям’ю, бо там любяць. Падабаецца хадзіць у школу – маю шмат сяброў. А калі вырасту, выйду замуж і нараджу дзяцей – 10. Буду пра іх клапаціцца: карміць, апранаць, забаўляць, шкадаваць…
*Калі сябруеш з кімсьці, значыць, гуляеш разам з ім у аднолькавыя гульні. Сваімі сябрамі магу назваць Рому і Дзіму.
Чалавек можа сябраваць з усімі, хто знаходзіцца побач. Напрыклад, са старшакласнікамі. Мы вучымся з імі ў адной школе, да таго ж яны нас не крыўдзяць, не сварацца з намі.
А вось сакрэты сябрам не абавязкова расказваць – для гэтага ёсць мама з татам.
*Мара – гэта тое, што хочаш, каб у цябе з’явілася. Напрыклад, пра падарункі на Новы год трэба расказаць бацькам, а яны перададуць пажаданні Дзядулю Марозу – і застанецца толькі чакаць. Калі добра сябе паводзіць, пад ёлкай з’явіцца тое, што прасілі.
Цяпер у мяне тры мары. Хачу купіць маме вялікую бліскучую сумку, яна падышла б да многіх убораў. (Летуценна.) І сабе такую ж хацела б, толькі маленькую... Хадзілі б з мамай прыгажунямі… А яшчэ мару пра новы тэлефон і паляцець у Дубай – схадзіць там у кафэ! Пакуль толькі мая бабуля лятала на самалёце…
*Усе дзеці любяць гуляць у цацкі, больш за ўсё – у кубікі, будаваць домікі для мяккіх цацак, «пячы» ў формачках торцікі ў пясочніцы. Ёсць і небяспечныя гульні: у даганялках можна паваліцца ці ступіць на камень і пашкодзіць нагу – такіх забавак трэба асцерагацца.
У мамы хутка народзіцца малыш – дзяўчынка ці хлопчык. Калі крыху падрасце, са старэйшымі сястрычкамі навучым яго прыгожа маляваць.
Улляна Саўко, 12 гадоў
У жыцці дзіцяці, мабыць, самае цудоўнае – бесклапотнае дзяцінства. Заўважыла, яго пачынаюць цаніць, калі становяцца дарослымі, – успамінаюць з цеплынёй.
*Падтрымка, дапамога, аднолькавыя інтарэсы – вось у чым заключаецца сяброўства. А калі ведаеш, што чалавек з табой на сувязі 24/7, яму можна даверыць сакрэты, бо давяраеш, як самому сабе, то дакладна ў цябе ёсць лепшы сябар.
Лічу, што прыяцеляў – людзей, з якімі часта стасуешся, у кожнага можа быць шмат, а вось сябрамі становяцца не адразу, на гэта патрэбен час.
*Мары – гэта нашы жаданні, моцныя, ажыццяўлення якіх мы вельмі чакаем.
Думаю, амаль усе мараць пра добрае шчаслівае жыццё. Калі браць у катэгорыях дарослыя і дзеці, то жаданні будуць залежаць ад узросту. Самы жаданы падарунак для малыша, напрыклад, цацка. Школьнікі чакаюць канікулы…
Чараўнікоў па здзяйсненні мар далёка шукаць не трэба, яны заўсёды побач – гэта ты сам, твае блізкія і сябры.
Я, напрыклад, бачу сваю будучыню шчаслівай, з любімымі людзьмі, і буду старацца зрабіць яе такой.
*Інтарэсы, як і мары, залежаць ад узросту людзей.
У малодшых дзяцей любімы занятак – гульня, не статычная, а тая, дзе трэба рухацца, нешта рабіць. Мае равеснікі таксама аддаюць перавагу гульням, толькі ўжо камп’ютарным. Гэта калі абагульняць. А ўвогуле ўсё індывідуальна: ёсць месца і спорту, і творчасці, і інтэлектуальнаму накірунку – усё залежыць ад магчымасцей і задаткаў, нават ад асяроддзя, у якім знаходзішся.
Я, да прыкладу, люблю гатаваць і спрабую пісаць невялікія гісторыі.
