Пра сваю справу расказваюць прыбіральшчыкі тэрыторыі Анастасія Басараб і Галіна Янульчык
17:00 / 01.05.2025
Першым прыкладам чалавека справы для гэтых людзей сталі бацькі. Адзін, зайшоўшы на работу да мамы, яшчэ дзіцям вырашыў, што будзе, як і яна; другі, слухаючы размовы пра татавы рабочыя будні, уяўляў сябе на яго месцы; іншы пераходзіў ад мар да справы – і, гуляючы з лялькамі-машынкамі, прымяраўся да будучай прафесіі. Пра тых, хто абраў справу па прыкладзе родных і прадоўжыў працоўную дынастыю, чытайце ў гэтых матэрыялах.
Галіна Станіславаўна працуе дворнікам у ЖКГ ужо 26 гадоў.
– Цяпер работы стала больш. Па-першае, горад прырос трыма мікрараёнамі. Па-другое, прыбіралі яго раней па-іншаму – больш павярхоўна: паперкі, акуркі і смецце сабралі – ды й годзе. Але шмат увагі надавалі дарогам, асабліва пасля зімы. Наш інструмент тады – адзін бярозавы венік. Гэта цяпер чысціня ідэальная ў кветніках, на тратуарах, на вуліцах!
Цяпер Галіна Станіславаўна абслугоўвае ўчастак у адным з новых мікрараёнаў: вуліцу Аэрадромную і сквер за дзіцячым цэнтрам творчасці. Пачынала працаваць з Кастрычніцкай, потым на Валадарскага – да яе рэканструкцыі.
Дарогі цяпер прыбірае тэхніка, мы на падхваце – калі машына зламаецца. Раней, успамінае жанчына, і несанкцыянаваныя звалкі ў вёскі ездзілі прыбіраць.
– Як бы дворнікі ні стараліся, усё ж чысціня і прыгажосць астравецкіх вуліц ляжыць на нашым майстры Зінаідзе Мікалаеўне, – дадае Галіна. – Заўважыць нават самую маленькую паперку. Увогуле, лічу, астравецкіх прыбіральшчыкаў тэрыторыі трэба паказваць па тэлевізары і ў «ЦікТоку». Дасылаю знаёмым фота і відэа нашых чыстых вуліц, яны не вераць: гэта толькі каля райвыканкама, каменціруюць. Не, кажу. Так усюды.
– Нам заўсёды дзякавалі за работу і словам, і зарплатай – гэта добры стымул, – лічыць Галіна Мікалаеўна. – Першыя гады тры мая Насця саромелася, што працуе дворнікам, а потым з’явіўся гонар.
Анастасія Басараб прыйшла «на падмогу» маці амаль 16 гадоў назад, адразу пасля школы. Шмат гадоў «заведвала» вуліцай Зялёнай, цяпер шчыруе ў цэнтры горада – на плошчы.
– Сям’я ў нас была шматдзетнай, двое братоў ужо вучыліся, бацькі прапанавалі мне пачакаць з паступленнем, – расказвае Анастасія. – І ў выніку засталася. Мне тут добра, і зарплата задавальняе.
– Год за годам у горадзе становіцца ўсё чысцей – і мы прывыклі, што так трэба, – гаворыць Анастасія. – Гледзячы на чыстыя вуліцы, хочацца падтрымліваць гэты парадак. Была ва Украіне, з Башкірыі нядаўда вярнулася – з Беларуссю не параўнаць. Я дворнік, таму не магла не звяртаць увагі на іх газоны і дарогі. О, што там робіцца! У мяне нават здымкі ёсць – там проста засцелена паперкамі! Якая чыстая і прыгожая наша Беларусь! Шмат мела прапаноў змяніць работу. Апошняя ад мамы – паступіць вучыцца. Але нават адвучыўшыся, хачу тут застацца, падабаецца наша з мамай справа. Не разумею, як можна днямі сядзець у кабінеце. Мне на паветра трэба. А фізічныя нагрузкі – прафілактыка захворванняў. (Смяецца.)
Подписывайтесь на телеграм-канал «Островецкая правда» по короткой ссылке https://t.me/ostrovetsby.
Телеграм-канал «Островецкая правда» – всё самое интересное из жизни Островца и Островецкого района.
