Астраўчанкі разважаюць пра беларускую мову ў штодзённым жыцці

12:00 / 21.02.2025

Ці ёсць больш мілагучнае свята чым Дзень роднай мовы? Спыталі ў жыхарак Астравеччыны, ці часта ім даводзіцца сутыкацца з беларускай мовай у звычайныя дні.

Аляксандра Яблонская і Эмілія Тумаш, вучаніцы сярэдняй школы №1:

Аляксандра:

– З беларускай літаратуры чытаем менавіта тое, што даюць на ўроках: Купалу, Коласа. Часам на занятках праглядаем тэксты на тэму вайны, яны для мяне надта цяжкія, бо вельмі перажываю за лёс герояў.

Эмілія:

– Нядаўна чытала «Бандароўну» Купалы, спадабалася, бо напісана простай мовай. Звычайна на ўроках сутыкаемся з класічнымі беларускімі творамі, дзе ўжываюцца словы, якія не гаворым у штодзённым жыцці. Гэта ўскладняе чытанне і іх разуменне.

Вікторыя Змітровіч, у дэкрэтным адпачынку:

– Часцей за ўсё беларускую мову чуем, калі глядзім навіны. З мужам добра ёю валодаем, бо вучыліся ў беларускамоўным класе. З задавальненнем праглядваю ролікі ў «ЦікТок», там таксама сустракаюцца беларускамоўныя. Пакрысе і дзяцей вучым размаўляць па-беларуску – упэўнены, вельмі важна ведаць родную мову.

Ева Шырынская, вучаніца сярэдняй школы №1:

– Сутыкаюся з роднай мовай амаль штодзённа. Сачу за навінамі, якія выкладае блог пра ліцэй БДУ, бо зацікаўлена ім. Там гавораць пра паступленне ў ліцэй, жыццё студэнтаў, ёсць таксама розныя конкурсы. І ўсё гэта па-беларуску! Прыемна паслухаць і пачытаць.

Галіна Новікава, пенсіянер (без фота):

– Васіля Быкава люблю і Ніла Гілевіча, перачытваю «Новую зямлю» Якуба Коласа. Хаця ў апошні час больш чытаю кнігі на рускай мове. Працавала настаўніцай беларускай мовы і літаратуры ў школе, таму размаўляю толькі па-беларуску і ўсё жыццё.

Алена ВАЙЦЯХОВІЧ, студэнтка факультэта журналістыкі БДУ.