Па выніках работы за мінулы год ветурач МТК “Малі” Андрэй Калпак прызнаны адным з лепшых спецыялістаў вобласці
Вось і вынікае, што кожны з нас на рабочым месцы бы звяно вялікага механізма: здаецца, і нябачнае, а выпадзе – камфорт і звыклы рытм жыцця парушыцца.
Цягам апошніх гадоў КСУП «Гудагай» з’яўляецца нязменным лідарам ў малочнай вытворчасці раёна, а яе працаўнікоў прызнаюць лепшымі
ў прафесіі.
Па выніках работы за 2024-ты Андрэй Калпак заняў 2-е месца сярод тэхнікаў па штучным асемяненні жывёлы ў абласным спаборніцтве ў вытворчасці жывёлагадоўчай прадукцыі.
Ветэрынарны ўрач малочна-таварнага комплексу «Малі» КСУП «Гудагай» Андрэй Калпак:
Комлекс у Малях адзін з самых «узроставых»: мясцовую ферму дабудавалі, завезлі новае абсталяванне і з 2008 года аб’ект стаў называцца МТК.
– Тут працую 18 гадоў, – расказвае мужчына. – У прафесію прыйшоў выпадкова. За кампанію з аднакласнікам адвучыўся на ветэрынарнага фельчара ў Ільянскім сельскагаспадарчым тэхнікуме. Размеркаваўся ў родны калгас – тады гэта быў СВК «Варняны». Пачынаў працоўны шлях на першым у раёне малочна-таварным комплексе «Кярняны». Праз тры гады перайшоў у СВК імя Гашкевіча на «Малі», з таго часу тут. Жонка, з якой гадуем трох дзяцей, дарэчы, працуе ў нашай гаспадарцы бухгалтарам.
На комплексе, дзе цяпер утрымліваецца звыш 1 700 галоў, увесь ветэрынарны накірунак закрываюць два спецыялісты. Андрэй Калпак адказвае за лячэнне гінекалагічных захворванняў і штучнае асемяненне кароў, а яго напарнік Анатоль Даўляш займаецца мастытамі і ўрачаваннем цялят.
– У нашай прафесіі, ды і ўвогуле, жывёлагадоўлі, выпадковасцяў не бывае, – працягвае Андрэй. – Малочна-таварны комплекс – гэта жывы арганізм, функцыянаванне якога залежыць ад кожнага. У новы год мы ўвайшлі з добрым паказчыкам: надой ад каровы за 2024-ты перавысіў 11 тысяч кілаграмаў малака – гэта другі вынік па гаспадарцы і ў раёне. Многія кажуць, што малако ў каровы на языку – і з гэтым не паспрачаешся. Кармы павінны быць збалансаванымі і якаснымі. Але многае залежыць і ад такога паказчыку, як выхад цялят, – ён ў нас склаўся на ўзроўні 83%. Гэта нядрэнна, але ёсць куды імкнуцца далей: над гэтым і буду працаваць.
Упэўнена, што планы Андрэя Калпака наконт нарошчвання вытворчых паказчыкаў, абавязкова спраўдзяцца.
