Пасля выхаду на пенсію Іосіф Пазлевіч стаў пісаць вершы і выразаць драўляныя скульптуры
Пенсія – час для самарэалізацыі –лічыць Іосіф Пазлевіч з Радзюшоў.
Амаль усё прафесійнае жыццё Іосіфа Пазлевіча прайшло ў Альхоўцы – тут ён працаваў на кардоннай фабрыцы вадзіцелем пагрузчыка. А жыў у вёсцы Радзюшы. Родны край ва ўсе часы быў для мужчыны невычэрпнай крыніцай натхнення.
Іосіф Мар’янавіч знаходзіцца на заслужаным адпачынку. Пасля выхаду на пенсію з’явіўся час для творчасці.
У дзяцінстве Іосіф мог гадзінамі сядзець і назіраць за бацькам, які ляпіў з гліны разнастайныя статуэткі. Гэтая справа прываблівала хлапчука, ён таксама захапіўся. Пазней вырашыў паспрабаваць разьбу па дрэве – атрымалася. З-пад яго рук выходзілі сапраўдныя шэдэўры: адмысловыя лесавічкі, магутныя мядзведзі і нават фігуры людзей.
Нядаўна ў Альхоўскай бібліятэцы адкрылася выстава “Цуды з дрэва”, на якой Іосіф Пазлевіч упершыню прадставіў свае вырабы шырокаму колу гледачоў. Яны здзіўляюць і захапляюць! За кожнай фігурай – тытанічная праца. На выраб некаторых скульптур патрабуецца каля тыдня, іншых – месяц ці нават больш. Натхненне не мае раскладу, і майстар часам працуе і ноччу.
Нядаўна Іосіф Мар’янавіч завяршыў работу над скульптурай мядзведзя. Яна выразана бензапілой. Вялікая пыса, шырока расстаўленыя лапы – постаць гаспадара лясоў заварожвае і здзіўляе. Ёсць у апантанага рупліўца мара – выразаць галаву зубра ў натуральную велічыню. Мужчына спадзяецца, што неўзабаве зможа ажыццявіць гэтую ідэю.
Кажуць, што таленавіты чалавек таленавіты ва ўсім. Акрамя лепкі з гліны і разьбы па дрэве, мужчына працуе… са словам: ён піша цудоўныя вершы, якія час ад часу з’яўляюцца на старонках раённай газеты. Майстар імкнецца несці прыгажосць і чысціню ў гэты свет, напаўняць яго хараством.
Сціплы, інтэлігентны, сарамлівы, ён валодае магутным творчым стрыжнем, асаблівым бачаннем свету.
Залаты ўзрост адкрыў для Іосіфа Мар’янавіча безліч магчымасцей і дапамог знайсці сябе. Майстар перакананы: пенсія – гэта час для самарэалізацыі.
Спадзяеёмся, мы яшчэ ўбачым шмат новых граняў творчай натуры Іосіфа Пазлевіча.
Вольга ЗАЯНЧКОЎСКАЯ,
бібліятэкар ДУК “Астравецкая раённая бібліятэка”.