Як нарыхтоўваюць сілас з кукурузы ў саўгасе «Падольскі», даведаўся карэспандэнт
У рацыёне буйной рагатай жывёлы спажыўны і карысны сілас займае значную частку. Таму ролю кукурузы ў кормавытворчасці складана пераацаніць. Цяпер яе актыўна ўбіраюць усе гаспадаркі раёна – у сярэднім за дзень у тэхналагічныя ёмістасці для захоўвання травяністых кармоў закладваецца звыш 4 тысяч тон здробненай масы.
За гэтым працэсам паназірала ў РУП «Астравецкі саўгас «Падольскі», дзе, да слова, на скошванні цеплалюбівіцы задзейнічаны новыя кормаўборачныя комплексы КВК-РS80РRО айчыннай вытворчасці.
Гэты год выдаўся спрыяльным для раслінаводства. Здаецца, жніво засталося далёку ззаду, але напружанне на палях не спадае. Хлебаробы рыхтуюць глебу, сеюць азімыя культуры, убіраюць цукровыя буракі і кукурузу на сілас і зерне, на некаторых участках «здымаюць» трэці-чацвёрты ўкос і нарыхтоўваюць сянаж у стрэйч-плёнку… Словам, работы вядуцца па некалькіх франтах.
Што тычыцца аграрыяў саўгаса «Падольскі», то ў іх восеньскія планы ўваходзіць сяўба азімых збожжавых на 1 800 гектарах, уборка буракоў з 400 га і кукурузы з 1 400 га, з якіх 200 – на зерне.
Летась у гаспадарцы ўзнікалі праблемы на ўборцы гэтай культуры – у першую чаргу з-за тэхнічна састарэлых агрэгатаў. Справіцца дапамагалі калегі з іншых гаспадарак. Сёлета парк сельгастэхнікі «Падольскага» папоўнілі 2 новыя кормаўборачныя комплексы КВК-РS80РRО, таму нарыхтоўка сіласу тут вядзецца актыўна.
Адзін камбайн працаваў на полі за вёскай Панарцы. Новы агрэгат даверылі вопытнаму механізатару Аляксандру Шостаку, які неаднойчы дэманстраваў свой прафесіяналізм. Нагадаю: па выніках вясенне-палявых работ райкам прафсаюза работнікаў аграпрамысловага комплексу прызнаў мужчыну лепшым сейбітам цукровых буракоў.
Запытала ў камбайнера, ці радуе ўраджай і новая тэхніка.
– Высокая, мажная кукуруза вырасла – сапраўдная «каралева палёў». Мяркуйце самі: на круг набіваю пад 400 цэнтнераў, – расказаў Аляксандр. – Камбайн таксама радуе, сёлета на ім і травы ўбіраў. Да гэтага працаваў на «Ягуары», ён часта псаваўся – а гэта вымушаны прастой, таму што запчасткі дарагія і іх складана дастаць. Цяпер зусім іншая справа: працаваць на новай машыне ў асалоду.
Кукурузную масу з поля на малочна-таварны комплекс у Рытань вазілі некалькі адзінак тэхнікі. Каб не перарываць працэс і не замінаць вадзіцелям, перакінулася з імі толькі некалькімі словамі.
Камбайнер Аляксандр Шостак
І Альберт Капуста, і Дарыўш Шадзянец, што называецца, хлопцы сваёй гадоўлі. Абодва мясцовыя, абодва мэтанакіравана атрымалі прафесію сельскагаспадарчага профілю і прыйшлі ў родны саўгас. Больш таго, маладыя людзі сямейнымі экіпажамі (у пары з бацькамі) сёлета абмалочвалі збожжа.
– Тысячу тон з татам на жніве ўзялі, – з усмешкай зазначыў Альберт і паімчаў да кормаўборачнага камбайна.
Альберт Капуста возіць масу на комплекс
Дарыўш Шадзянец, вадзіцель
Як расказала начальнік МТК «Рытань» Алена Юхна, з травяністымі кармамі ў апошнія гады праблем не ўзнікае.
– На сёння ўжо заклалі шмат кукурузы ў бурт. Пляцоўка пад гэта забетаніраваная, увесь працэс вядзецца ў адпаведнасці з тэхналогіяй. Вільготнасць і тэмпературу масы мераем некалькі разоў на дзень, правяраюць яе і спецыялісты з райветстанцыі, – расказала Алена Валяр’янаўна.
– На комплексе 1 490 галоў, з якіх 800 – дойны статак, – пераходзіць да спраў комплексу яго загадчык. – Дарэчы, для аздараўлення жывёлы, асабліва канечнасцей, некаторыя групы першага перыяду і нецелі летам пасвіліся. Па малаку «плюсуем», сярэднясутачны надой складае 21,5 кілаграма, на перапрацоўку адпраўляем яго гатункам экстра. Хоць у апошні час моцна змяніліся тэхналогіі, але актуальнасці не траціць дзедаўскае выказванне: малако ў каровы на языку. Таму прыярытэтная задача – нарыхтаваць як мага больш кармоў добрай якасці. Упэўнена, што мы з гэтым справімся.
Алена Юхна, начальнік малочна-таварнага комплексу «Рытань»
Слова спецыялісту
Антон Лапуцэвіч, загадчык раслінаводчага ўчастка:
– На ўборцы кукурузы працуюць тры кормаўборачныя комплексы. Акрамя гэтага, адзін камбайн задзейнічаны на скошванні траў для падкормкі жывёлы. У залежнасці ад аб’ёмаў на адвозцы занята 8-10 адзінак тэхнікі, на буртаванні масы – два «Амкадоры» і трактар. На ноч яна закрываецца спецыяльнай плёнкай, а пасля запаўнення траншэі кансервуецца з дапамогай вакумнай і чорна-белай. Корманарыхтоўку, у прыватнасці сіласу, у нашай гаспадарцы ацэньваю на «выдатна».
Антон Лапуцэвіч, загадчык раслінаводчага ўчастка