Уражаннямі дзеляцца госці свята
Жанна і Дзмітрый Волк-Леановічы:
Жанна:
–Свята вельмі спадабалася. Асабліва ўразіў урачысты мітынг ля помніка савецкім воінам і партызанам: было вельмі кранальна, шчыра – да слёз. Не магла адвесці позірку ад невялікай групы воінаў-інтэрнацыяналістаў: гэтыя людзі сапраўды ведаюць, што такое вайна і што такое мір, якой цаной ён дастаўся і як яго трэба берагчы.
Спадабалася і прэзентацыя прадпрыемстваў і арганізацый. На падворку лясгаса пачаставаліся свежым мёдам у сотах і буякамі – смачна!
Дзмітрый:
–Усё на свяце добра, акрамя адной дэталі, якая ўжо не першы раз псуе настрой. Цудоўнае прадстаўленне ля помніка, але пабачыць і пачуць, што адбываецца, могуць толькі тыя, хто стаіць у першых радах. Каму не пашанцавала, сузіраюць спіны. І гук да апошніх радоў не далятае. Гэта трэба паправіць, рыхтуючы наступныя святы.
А яны патрэбны хоць бы для таго, каб пабачыць даўніх знаёмых у добрым здароўі.
Леанід Мельгуй з унукамі Захарам і Міронам:
–На свята мы прыйшлі з унукамі. Усё цудоўна, арганізацыя выдатная! Дзецям больш за ўсё спадабалася зброя і ваенная тэхніка – за вушы не адцягнуць! Сярэдні ўнук недзе застаўся каля аўтаматаў – вучыцца разбіраць і збіраць.
#80-годдзе_вызвалення_Беларусі_ад_нямецка-фашысцкіх_захопнікаў