Прафесію трактарыста можна будзе атрымаць у Варнянах
12:00 / 25.06.2024
За некалькі дзесяцігоддзяў вясковая моладзь значна змянілася: калі гадоў 30 назад хлапчукі ледзь не пагалоўна хацелі быць трактарыстамі і шафёрамі, то цяпер у трэндзе інфармацыйныя тэхналогіі, юрыспрудэнцыя… Тым не менш, ёсць сучасныя маладыя людзі, якія хочуць працаваць у аграпрамысловым комплексе.
Нагодай для гэтага артыкула стала публікацыя ў нашай газеце невялікай замалёўкі пра працавітага хлопца з дынастыі механізатараў, які пасля заканчэння каледжа вярнуўся на Астравеччыну ў адзін з КСУПаў. Падчас інтэрв’ю ён сказаў, што мае спецыяльнасць слесара, але хоча вывучыцца на трактарыста, каб, як і бацька, убіраць у роднай гаспадарцы травы, збожжа…Хлопец звярнуўся ў варнянскі цэнтр падрыхтоўкі, які ў народзе па старой звычцы называюць вучэбна-вытворчым камбінатам, яму прапанавалі пачакаць набору… Але калі ён пачнецца, не ўдакладнілі.
На днях у рэдакцыю патэлефанаваў дырэктар цэнтра падрыхтоўкі, павышэння кваліфікацыі і перакваліфікацыі рабочых упраўлення сельскай гаспадаркі і харчавання райвыканкама Аляксандр Багдановіч, каб праліць святло на праблему.
Аказваецца, з нашага і іншых раёнаў ахвочых атрымаць «корачкі» трактарыста ў Варнянах не адзін дзясятак, але па аб’ектыўных прычынах распачаць вучобу менавіта па гэтай спецыялізацыі да нядаўняга часу цэнтр не мог.
Аляксандр Багдановіч
– Патрабаванні сертыфіцыруючых органаў вельмі высокія. Першапачаткова яны распрацаваны для вну. І такім невялікім раённым вучэбным арганізацыям, як наша, няпроста іх выканаць, – прадоўжыў суразмоўца. – Наколькі мне вядома, з-за складанасці атрымання дазволу на навучанне вадзіцеляў механічных транспартных сродкаў пакуль адмовіліся ад праходжання сертыфікацыі Смаргонскі політэхнічны ліцэй, Свіслацкі, Зельвенскі вучэбныя цэнтры ўпраўлення сельскай гаспадаркі і харчавання, і нават Гродзенскі абласны.
Спецыялісты астравецкага цэнтра райсельгасхарчу на чале з дырэктарам Аляксандрам Багдановічам не пабаяліся цяжкасцей і вырашылі зрабіць усё магчымае для атрымання запаветнага сертыфіката, каб у Варнянах можна было па-ранейшаму рыхтаваць трактарыстаў-машыністаў, якія патрэбны і нашым гаспадаркам.
– Адно з аноўных патрабаванняў – наяўнасць уласнага аўтадрома. Дзякуючы дапамозе прадпрыемстваў і арганізацый раёна за месяц гэты аб’ект пабудавалі, – працягнуў Аляксандр Іванавіч. – Карыстаючыся магчымасцю, выказваю падзяку кіраўніцтву цэнтральнай раённай клінічнай бальніцы, Астравецкага лясгаса, КСУП «Гервяты», КСУП «Гудагай» і сваім работнікам. Хоць у штаце нашага цэнтра толькі 5 чалавек, але кожны адказна паставіўся да справы: не шкадуючы ўласных часу і сіл дружна працавалі на аб’екце.
Дырэктар прапанаваў наведаць аўтадром, дзе, верыцца, неўзабаве вадзіцельскае майстэрства будуць адточваць будучыя трактарысты-машыністы і не толькі.
Аўтадром цэнтра райсельгасхарчу размясціўся ў Дубніках непадалёк ад былога панскага маёнтка Мінэйкаў, у якім пазней размяшчаўся дом-інтэрнат для псіханеўралагічных хворых. Цяпер гэты аб’ект знаходзіцца на балансе Астравецкай ЦРКБ.
Адзначу, што ў ахвочых бясплатна пазаймацца на аўтадроме зрабіць гэта не атрымаецца: заезд на тэрыторыю зачынены, а адпаведная таблічка папярэджвае, што туды дазваляецца заязджаць транспарту цэнтра і ЦРКБ.
– Удзячны кіраўніцтву раённай бальніцы, што дало ў бязвыплатнае карыстанне ўчастак, дзе цяпер размяшчаецца аўтадром, – расказаў субяседнік. – Перамешчана каля 150 тон грунта, зрасходавана звыш 4 кубаметраў цэменту, зроблена і ўстаноўлена амаль 100 элементаў і 2 дзясяткі дарожных знакаў, прыведзена ў парадак і акультурана тэрыторыя.
Гэта бачна і няўзброеным вокам. Асабліва кінулася ў вочы вялікая эстакада.
– Пляцоўка пабудавана па ўсіх правілах і падыходзіць для практычных заняткаў з вадзіцелямі легкавых і грузавых аўтамабіляў, самаходных сельгасмашын і трактараў любога класа, – патлумачыў дырэктар. – Да гэтага мы арандавалі аўтадром у Ашмянах – а гэта каля 40 кіламетраў у два бакі. Цяпер адлегласць да месца навучання 5 кіламетраў – толькі на паліве эканомія відавочная. Дарэчы, практычныя навыкі ваджэння адпрацоўваем і па маршруце Варняны – Дубнікі – Варона – Трокенікі – Варняны. У дзень, калі з Аляксандрам Іванавічам аглядалі аб’ект (19 чэрвеня. – Заўв.аўт.), жадаючых вывучыцца на трактарыста-машыніста ў варнянскім цэнтры ўжо было 72, штодзень чарга павялічваецца на аднаго-двух чалавек. Шмат людзей па гэтым пытанні тэлефануе ў цэнтр.
Напрыканцы чэрвеня спецыяліст зробіць ацэнку адпаведнасці тэхнічным патрабаванням установы, аб’ектаў, у тым ліку аўтадрома, дакументацыі, вучэбных праграм і многага іншага…
Спадзяюся, што намаганні спецыялістаў цэнтра падрыхтоўкі, павышэння кваліфікацыі і перакваліфікацыі рабочых былі недарэмнымі і яны атрымаюць дазвол на навучанне, а жадаючыя – спецыяльнасць. У тым ліку і малады слесар, які марыць працаваць на трактары, а не толькі рамантаваць яго.