Станіслаў Валодзька расказвае пра ўдзел у свяце кнігі ў Гродна

Мне, ураджэнцу Астарвеччыны, пашчасціла прыняць удзел у свяце кнігі, якое было арганізавана Гродзенскім абласным аддзяленнем Саюза пісьменнікаў Беларусі.

Каля Дома-музея пісьменніцы Элаізы Ажэшкі я разам з іншымі ўдзельнікамі свята прачытаў свае вершы і перадаў свае кнігі ў дар Гродзенскай абласной бібліятэцы імя Яфіма Карскага.

Затым была аўтограф-сесія, дзе падпісаў публікацыі сваіх твораў у калектыўных кнігах, якія ёсць у гэтай бібліятэцы.

Мае сябры з Латвіі праспявалі песню на мае словы “Палын і медуніца” (музыка Эдуарда Вартанава) і перакладзеную мной на беларускую мову папулярную “Алесю” Алега Іванова і Анатоля Папярэчнага.

Прыемна было перамовіцца з беларускімі пісьменнікамі, якіх даўно ведаю: Людмілай Кебіч, Алінай Сабуць, Дзмітрыем Радзівончыкам, Кастусём Цыбульскім і дамовіцца аб далейшых стасунках.

Назаўсёды застануцца ў памяці наведванне Старога замка, Каложскай царквы і Аўгустоўскага канала.

                                                                                               Станіслаў ВАЛОДЗЬКА, член СПБ.