Рэпартаж з фінішнай прамой першага ўкосу КСУП “Міхалішкі”
14:45 / 17.06.2024
Напрыканцы мінулага тыдня карэспандэнт «раёнкі» з’ездзіў у КСУП «Міхалішкі», каб даведацца , як і з якім настроем аграрыі гаспадаркі завяршаюць першы ўкос і ці атрымалася падчас яго нарыхтаваць запланаваную колькасць травяністых кармоў.
Ад паспяховасці зялёнага жніва залежыць, як будзе праходзіць зімне-стойлавы перыяд і развівацца мяса-малочная вытворчасць, адпаведна і эканоміка гаспадаркі.Нягледзячы на няпросты для нарыхтоўкі кармоў мінулы год, у КСУП «Міхалішкі» абышліся без прывазных сенажу і сіласу. Касавіцу тут пачалі з больш урадлівых сенажацей. У дзень, калі прыехала рабіць рэпартаж, корманарыхтоўшчыкаў «злавілF» ажно пад Спондамі.
На ратацыйнай касілцы КМР з 9-мятровым захопам травы ў пракосы клаў Сяргей Сташко. Летась па выніках працоўнага спаборніцтва прафсаюза работнікаў аграпрамысловага комплексу мужчына стаў лепшым у раёне касцом. Пацікавілася ў механізатара, ці плануе сёлета паўтарыць мінулагодні вынік.
Сяргей Сташко, касец
– Як атрымаецца. Але дрэнны той салдат, які не марыць пра генеральскія пагоны, – аджартаваўся мужчына. – Сачу за прафсаюзнымі зводкамі: пакуль у лідарах. А як далей будзе, час пакажа. На першым участку ёсць сенажаці, што касі сабе да вечара. А тут, на страчанскіх землях, працаваць складана. Палі дробнаконтурныя, невялікія, няма дзе напоўніцу развярнуцца.Да таго ж даводзіцца часта пераязджаць з участка на ўчастак. Па шчырасці, то і травы тут так сабе.
Леанід Бараноўскі, трамбоўшчык
Да слова, на раённым семінары па гатоўнасці гаспадарак да корманарыхтоўчага сезона старшыня райвыканкама Сяргей Мядзвецкас перад аграрыямі гэтай гаспадаркі паставіў задачу прапрацоўкі пытання паляпшэння ўкосных плошчаў і іх перазалужэння. З-за працяглага выкарыстання сенажацей трава ў «Міхалішках» была неўрадлівая. Як вырашаецца гэтае пытанне, пацікавілася ў галоўнага агранома Алега Кавалевіча, які ў полі сачыў за работай корманарыхтоўчага комплексу.
Алег Кавалевіч, галоўны аграном
– Над пытаннем працуем, хоць, вядома, узнікаюць цяжкасці, у прыватнасці, тэхнічнага характару. Напрыклад, на гэтым участку травы выкарыстоўваюцца тры гады. На восень плошчы плануем заараць і засеяць азімымі збожжавымі. Перазалужылі каля 260 гектараў – гэта палавіна ад запланаванага, падсеялі шматгадовыя травы на 352 гектарах, – патлумачыў галоўны тэхнолаг міхалішкаўскіх палёў. – Пашчасціла, што вясна сёлета ранняя. З восені пасеялі каля 100 гектараў свірэпіцы, з якой і распачалі касавіцу ў нашай гаспадарцы. Гэтую культуру выкарыстоўвалі ў якасці зялёнай падкормкі для жывёл і закладвалі ў тэхналагічныя ёмістасці для захоўвання кармоў. Травы, канешне, у гэтым годзе лепшыя, чым летась, але не на ўсіх участках. Каб дажджы пайшлі на месяц раней, валкі былі б у пояс.Лічыцца, што за першы ўкос трэба нарыхтаваць як мінімум 60% сенажу. Запытала ў агранома, ці зробяць яны гэта.
– Мяркуйце самі: на раніцу 13 чэрвеня мы заклалі амаль 6 тысяч тон з запланаваных 11. Нарыхтавалі 55 тон сена, – расказаў Алег Кавалевіч. – Адзінае засмучае, што некаторая тэхніка падводзіць, але ёсць у нас і новыя агрэгаты.
КСУП «Міхалішкі», як РУП «Астравецкі саўгас «Падольскі» і КСУП «Варняны» да пачатку першага ўкосу атрымаў новы корманарыхтоўчы комплекс КВК-РS80РRО гомсельмашаўскай вытворчасці. Такая дапамога ад дзяржавы прыйшлася вельмі дарэчы і своечасова: тэхнічна састарэлыя камбайны часта ламаюцца, адпаведна, стрымліваюцца тэмпы касавіцы.
У дзень майго прыезду падымаў і здрабняў падвяленую траву толькі навічок, на якім працаваў Валерый Сташко.
Валерый Сташко, камбайнер
– Для мяне гэта першы сезон на камбайне. Да гэтага касіў і вазіў траву, – расказаў механізатар. – Калі тэхніка новая, і працаваць на ёй прыемна. Усю «зялёнку» закладваем з кансервантам – яго падача ў камбайне аўтаматызавана.У залежнасці ад колькасці працуючых корманарыхтоўчых камбайнаў размяркоўваецца і тэхніка для адвозу «зялёнкі» з поля да траншэй. Я налічыла тры транспартныя сродкі.
На новым трактары МТЗ-1523.3 рабіў гэта адзін з самых вопытных вадзіцеляў КСУП «Міхалішкі» Баляслаў Барадынка.
Баляслаў Барадынка, вадзіцель
– Летась атрымалі двух «Беларусаў». Адзін даверылі мне, другі – Сяргею Чымбару. Відаць, заслужыў, бо на трактары МТЗ-1221 ажно 23 гады ад’ездзіў, – расказаў мужчына. – Колькасць рэйсаў залежыць не толькі ад аддаленасці поля, але і ад ураджайнасці травы. Чым большыя валкі, тым часцей ездзім. Пачыналі з Маркун, Жукойняў, Супранентаў, цяпер масу возім у Страчу.
За фермай у вышэйзгаданым населеным пункце закладвалі ёмістасць для захоўвання травяністых кармоў – гэта была 5-я траншэя ў гаспадарцы.
Калі раней па рэгламенце траву трамбавалі кругласутачна, то цяпер – на працягу 3-х гадзін пасля апошняга заезду машыны. Колькасць рэйсаў, як і аб’ём перавезенай «зялёнкі», фіксуецца.
У КСУП «Міхалішкі» распрацаваны графік дзяжурства адказных за гэта спецыялістаў. Акрамя гэтага, павінны кантралявацца тэмпература і вільготнасць будучага сенажу. Лічыцца, што апошні паказчык павінен быць 50-60%. Калі градусы павышаюцца, ствараюцца спрыяльныя ўмовы для развіцця патагеннай мікрафлоры і цвілі – якасць корму зніжаецца.
Загадчык раслінаводчага ўчастка №2 Яніна Зімніцкая кантралявала працэс закладкі травы ў бетаніраванае сховішча. – Пастаянна вымяраем тэмпературу і вільготнасць. Часта прыязджаюць спецыялісты з райветстанцыі, – расказала жанчына. – Стараемся рабіць усё па тэхналогіі, каб на малочна-таварных фермах і комплексах зімой быў якасны сянаж.
Яніна Зімніцкая, брыгадзір раслінаводчага ўчастка №2