Пераможцы і ўдзельнікі фотаконкурсу “Дарункі восені”

15:13 / 12.09.2022

Падведзены вынікі фотаконкурсу «Дарункі восені», які рэдакцыя праводзіла сумесна з магазінам «Блеск».

Заяўкі на ўдзел даслала звыш дзесяці жыхароў раёна. Некаторыя фота вызначаюцца арыгінальнай пастаноўкай. Напрыклад, здымак Дзіяны Сінкевіч, дзе вялізныя агуркі дэманструе зусім яшчэ малады «гаспадар», або Наталлі Янкойць – яе фота падказвае, што дачка Паліна, мабыць, вельмі любіць стравы з буракоў.

Большая частка здымкаў «расказвае» пра незвычайныя – проста вялізныя! – памеры гародніны. Так, Станіслаў Памецька «выгадаваў» гарбуз вагой звыш 20 кілаграмаў, усе рэкорды пабілі цыбуля Ганны Варэйка, бурак Аксаны Шпургіс, перцы Марыі Захарыч, агуркі Анастасіі Баер і Алёны Гайдамовіч і памідор Таццяны Лукашэвіч.

Трапнымі назвамі адзначылі конкурсныя работы Міхаіл Сазон («Наступны прыпынак – магазін «Блеск», «Запрасіце мяне танцаваць») і Рэгіна Дрэма («Двайное шчасце»).

Увогуле кожны фотаздымак мае сваю адметнасць. Аднак па ўмовах конкурсу задача журы – выбраць самага арыгінальнага «гадаванца», які вырас на прысядзібным участку ўдзельнікаў.

Прэтэндавалі на перамогу здымкі Наталлі Янкойць, Алега Мундуця, Дзіяны Сінкевіч, Ягора Шэстака, але самым арыгінальным была прызнана морква на здымку Міхаіла Сазона.

Віншуем пераможцу і чакаем яго ў рэдакцыі для ўзнагароджвання!

Заўвага: У конкурсе ўдзельнічаў толькі 1 здымак аднаго аўтара, найбольш удалы па меркаванні журы.