На старце сяўбы збожжавых – аграрыі КСУП “Гервяты”
14:42 / 08.09.2022
За стартам пасяўной кампаніі ў гэтай гаспадарцы паназіраў карэспандэнт.
Зазначу, у КСУП «Гервяты» – найбольшыя сярод гаспадарак раёна плошчы вырошчвання не толькі збожжа, але і рапсу. Насенне крыжакветкавага ўжо прыгорнута ў глебу на адной тысячы гектараў, што складае каля трэці раённых плошчаў. Свірэпіцу – 130 гектараў – «гервятцы» таксама пасеялі. У бліжэйшых планах аграрыяў сяўба збожжавых: 1 680 гектараў трыцікале, 1 000 – пшаніцы, 330 – жыта і 20 – ячмень.
Ля аграгарадка Дайлідкі глебу пад сяўбу трыцікале рыхтавалі два энерганасычаныя агрэгаты ў счэпцы з плугам і культыватарам.
– Самі бачыце, як пыліць: вельмі патрэбны дажджы. У апошнія гады клімат змяніўся: часта супадаюць тэрміны асноўных сельгаскампаній. Пад сяўбу трэба зрабіць шмат тэхналагічных працэсаў: ворыва, культывацыя, унясенне мінеральных угнаенняў. На подступах і нарыхтоўка сіласу, – заўважыў адзін з самых вопытных механізатараў гаспадаркі, шматразовы прызёр раённага жніўнага спаборніцтва Іосіф Масевіч. – Глебу культывую першы дзень, пра масавую сяўбу пакуль гаварыць не выпадае.
За ворыва глебы ў КСУП «Гервяты» адказваюць вопытныя механізатары: неаднаразовы пераможца раённага конкурсу «Лепшы араты» Анджэй Ясевіч і штогадовы лідар працоўнага спаборніцтва райкама прафсаюза работнікаў аграпрамысловага комплексу на вясенне-палявых работах Андрэй Махонька.
– Глеба настолькі сухая, што месцамі выкідвае плугі на паверхню. Трактар цяжка ідзе, даводзіцца дастаткова часта замяняць долаты плуга, – расказаў Адрэй Махонька, які з ворывам, як і з культывацыяй, нягледзячы на ўсе цяжкасці, спраўляецца на «выдатна».
Адзін з самых вопытных сейбітаў раёна Эдуард Мілэйша прыгортваў у глебу жыта.
– Найлепш у раёне гэтая культура родзіць у нас. Сёлета на круг жыта дало пад 68 цэнтнераў. У чым сакрэт ураджайнасці? У агранома трэба цікавіцца, – гаворыць Эдуард Мілэйша. – У гаспадарцы пакуль сею адзін. Норма расходу: 60 кілаграмаў насення на гектар. Думаю, неўзабаве далучацца механізатары на іншых пасяўных агрэгатах.
Эдуард Мілэйша, сяўба
Андрэй Махонька, ворыва
Іосіф Масевіч, культывацыя