Раённая камісія па садзейнічанні занятасці сустрэлася з беспрацоўнымі Гудагайскага сельсавета

08:34 / 29.01.2019

Раённая камісія па каардынацыі работы па садзейнічанні занятасці насельніцтва працягвае сустракацца з працаздольнымі грамадзянамі, не занятымі ў эканоміцы. На гэты раз такая сустрэча прайшла ў Гудагайскім сельсавеце.

– Пасяджэнні камісіі па-ранейшаму будуць праходзіць два разы на месяц, – нагадвае старшыня камісіі па каардынацыі работы па садзейнічанні занятасці насельніцтва, старшыня раённага Савета дэпутатаў Ірына Тальчук. – Галоўная задача – дапамагчы людзям працаўладкавацца. Да таго ж да канца студзеня мы павінны сфарміраваць спіс грамадзян, якія будуць плаціць за гарачую ваду па поўным тарыфе.

Сакратар камісіі Ірына Раткевіч пералічвае тых, хто можа трапіць у гэты спіс, і агучвае самую вялікую праблему: некаторыя з названых грамадзян не жывуць па месцы рэгістрацыі і знайсці іх пакуль што не атрымліваецца.

Што ж датычыцца Гудагайскага сельсавета, то жадаючых працаўладкавацца, калі меркаваць па колькасці тых, хто прыйшоў на сустрэчу з членамі раённай камісіі, няшмат.

У кожнага з іх свае довады. У большасці адгаворка адна: на работу не бяруць. На справе сітуацыя адваротная: больш за пару дзён такія працаўнікі на новым месцы не затрымліваюцца.

Адзін з такіх – 46-гадовы А. Пасля лячэння ад алкагольнай залежнасці ён не раз спрабаваў уладкавацца ў сельскагаспадарчае прадпрыемства. Праўда, надоўга не затрымліваўся. Ды і было гэта гадоў пяць назад. З таго часу мужчына перабіваецца часовымі заробкамі, але працаваць згодзен – і члены камісіі абяцаюць дапамагчы яму знайсці працоўнае месца.

Не ўпэўнена, што і на гэты раз А. затрымаецца надоўга – але шанс на выпраўленне мае кожны. І добра, калі А. яго скарыстае.

664 чалавекі з Астравецкага раёна занесены ў базу дадзеных асоб, не занятых у эканоміцы.