Не старэюць душой ветэраны
17:36 / 23.03.2010
Днямі ветэран працы Марыя Уладзіміраўна Ляховіч і ветэран Вялікай Айчыннай вайны і працы Андрэй Андрэевіч Галагаеў адзначылі свае дні нараджэння. Марыя Уладзіміраўна святкавала 80-гадовы юбілей, а Андрэй Андрэевіч – 90-годдзе. А мы са старшынёй Савета ветэранаў Расціславам Арсеньцевічам Гертам накіраваліся да іх, каб павіншаваць з юбілейнай датай.
Марыя Уладзіміраўна, хаця і не з’яўляецца ўраджэнкай нашага раёна, усё сваё жыццё і веды аддала выхаванню і навучанню маладога пакалення, працавала настаўніцай Варонскай школы. Пасля ўручэння прывітальнага адраса і падарунка пачаліся размовы пра маладосць і школу. Калісьці Марыя Уладзіміраўна працавала ў адной сістэме з Расціславам Арсеньцевічам, таму ўспомніць было што і каго. У гэты дзень яна прымала віншаванні і ад сваіх былых калег, вучняў, старшыні сельскага Савета І.І. Пляўгі і, канешне ж, ад родных і блізкіх людзей.
Павіншаваць Андрэя Андрэевіча таксама сабраліся былыя калегі, сябры і родныя. Нягледзячы на свой паважаны ўзрост, ён такі ж актыўны. Ва ўрачыстай абстаноўцы Расціслаў Арсенцьевіч яму таксама ўручыў прывітальны адрас і падарунак. Павіншаваць юбіляра прыехаў і старшыня райкама прафсаюза работнікаў сельскай гаспадаркі Мікалай Канстанцінавіч Грыцкевіч, які з пажаданнямі здароўя ўручыў ветэрану вайны і працы кветкі і памятны падарунак.
– Заўсёды прыемна, калі цябе памятаюць не толькі блізкія людзі, але і твае сябры, вучні, калегі, з якімі ты калісьці працаваў, – гаварылі ветэраны. – Іх ўвага і ёсць найлепшы падарунак.
Алена ЯРАШЭВІЧ.
