На вяселлі, да і пасля яго – заўважынкі Ніны Рыбік

Фота не было – і вяселля не было

У маладажонаў, якія рэгіструюцца ў ЗАГСе, журналісты заўсёды пытаюць дазволу на тое, каб зрабіць вясельны здымак, які затым упрыгожыць “Астравецкую праўду”, яе сайт і старонкі ў сацыяльных сетках. Большасць з гатоўнасцю пагаджаюцца – асабліва гэта тычыцца іншагародніх, “чужым” наша традыцыя вельмі падабаецца. Нехта катэгарычна адмаўляецца. Бываюць пары, што доўга вагаюцца і раяцца адно з адным…

На такую аднойчы патрапіла калега. Расказвала, што жаніх і нявеста доўга ківалі адзін на аднаго:

–Ты як?

–А ты?

–Я – як ты…

–А я – як ты…

Але тут ўсе развагі перапыніла бабуля:

–Фота? Для “Астравецкай…”? Канешне ж, трэба зрабіць! Бо як картачкі ў газеце не было, то, лічы, і вяселля не было!

Аргументаў супраць не знайшлося.

Вуснамі мудрай бабулі гаворыць ісціна!