Мы заўсёды рады сустрэчы з вамі! Спадзяёмся, што і вы таксама!

Не першы раз у знамянальныя каляндар­ныя святы і падчас дзён падпісчыка «Аст­равецкая праўда» стараецца прыцягнуць увагу да раённых сродкаў масавай інфармацыі.

Вось і да Дня Незалежнасці мы выставілі сваю палатку. Праўда, спачатку не ўсе, хто праходзіў уздоўж вуліцы Ленінскай, дзе размясціліся месцы прадпрыемстваў і арганізацый горада, разумелі, што мы тут робім.

– А што вы прадаеце? – пыталіся цікаўныя. І мы з запалам расказвалі пра гісторыю газеты, яе супрацоўнікаў і сваю дзейнасць, прапаноўвалі аформіць падпіску на «раёнку» – і атрымаць за гэта бонус пры падачы аб’яўкі ці віншавання… І гэта далёка не ўсё цікавосткі, што былі ў нас.

Сёлета ў нашай палатцы мы арганізавалі выязную студыю тэлепраграмы «ТВА. ТВой Астравец», дзе прапаноўвалі астраўчанам і гасцям горада павіншаваць яе гледачоў з Днём Незалежнасці ці прачытаць тэкст навін. Многія вырашылі паспрабаваць сябе ў ролі вядучых, адзначыўшы потым, што справа гэта нялёгкая.

Каб перанесціся з дня сённяшняга ў мінулыя часы, у палатцы размясцілі ноўтбук – сапраўднага сябра сён­няш­ніх журналістаў і пішучую ма­шынку, якой карысталіся нашы супрацоўнікі да пачатку 90-х. А нашым наведвальнікам прапанавалі пакінуць з іх дапамогай віншаванне са святам. І трэба было бачыць, як малышы старанна націскалі на клавішы, стараючыся скласці літары ў словы. Адразу ж адзначу, што па клавіатуры камп'ютара атрымліваецца шпарчэй.

І як здзівіліся, калі адна з нашых чытачак – Ніна Раткевіч (на фота), якая працуе ў Дзяржстраху, хутка, амаль не гледзячы на клавіатуру, набрала віншавальны тэкст!

Сюрпрызы ў той дзень дарылі не толькі мы, але і тыя, хто завітаў у святочны дзень на нашу пляцоўку. Многія сталі для нас адкрыццём.

Так, прыемна ўразіў мужчына, калі мы хацелі падарыць яму свежы святочны выпуск газеты, ад­значыўшы, што ён толькі што купіў яе ў кіёску. Дарэчы, разам з сям’ёй ён прыехаў на Дзень Незалежнасці ў Астравец, а газету купіў таму, што яму цікава, аб чым піша раённая прэса суседняга раёна.

Парадавала, што большасць, калі мы прапаноўвалі аформіць пад­піску на чарговы месяц, 3-ці квартал ці паўгоддзе, адказвалі, што ўжо выпісалі «раёнку». А, можа, яны проста хітравалі?! Хоць так думаць і не хочацца.

Словам, свята прайшло, пакі­нуў­шы прыемныя ўражанні ў тым ліку і ад зносінаў з нашымі падпісчыкамі.

І няхай каляндар яшчэ толькі пераваліў за першую палову ліпеня, нагадваем: падпіска на жнівень ужо ідзе! 

Падпісацца на «раёнку» можна ва ўсіх паштовых аддзяленнях, а таксама ў рэдакцыі газеты. 

Мы заўсёды рады суст­рэчы з вамі! Спадзяёмся, што і вы таксама!