Астраўчанка Наталля Ачарэтава стварае карціны без пэндзля і фарбаў
Вышыўка для Наталлі Ачарэтавай – не проста хобі, а неад'емная частка жыцця. Нягледзячы на тое што жанчына ўзначальвае Астравецкую раённую бібліятэку і вольнага часу ў яе няшмат, яна заўсёды знаходзіць гадзінку для любімай справы. Вышываныя карціны Наталлі Уладзіміраўны ўражваюць і здзіўляюць. Шыкоўныя стракатыя півоні, зімовыя матывы, вытанчаны сілуэт жанчыны, вядомая актрыса Одры Хэпберн – усё гэта створана рукамі нашай таленавітай зямлячкі. Удзяляе ўвагу Наталля Уладзіміраўна і біблейскім матывам. Напрыклад, яна вышыла некалькі карцін з выявай Мадонны. Самай маштабнай сярод іх з'яўляецца «Песня анёлаў» – над ёй жанчына працавала некалькі гадоў.
– Наталля Уладзіміраўна, як узнікла ідэя стварэння такой карціны?
– Біблейскія матывы заўсёды прываблівалі. Я ўжо вышывала вобраз Мадонны, толькі ў меншым фармаце. Ідэя стварыць штосьці больш значнае ўзнікла нечакана, і спачатку я засумнявалася наконт яе ажыццяўлення, але ўсё атрымалася належным чынам.
– Колькі часу заняла праца над гэтай іконай?
– Я вышывала яе дзве зімы. Занятак дастаткова карпатлівы, бо патрабуе павышанай увагі. Тут нельга збіцца, апусціць або дадаць штосьці, пераблытаць колер. Таму, калі адчувала моцную стомленасць, за вышыўку не бралася.
– Які далейшы лёс у «Песні анёлаў»?
– Ікона ўжо асвечана ксяндзом і падаравана астравецкаму касцёлу Адшукання Святога Крыжа.
– Дзякуй за размову!
Гутарыла Вольга ЗАЯНЧКОЎСКАЯ,
Астравецкая раённая бібліятэка.
