Ад прападобнай Еўфрасінні
Маршрут шэсця пралягаў па Віцебскай і Гродзенскай абласцях, уздоўж памежжа з краінамі Прыбалтыкі.
У суботу, 8 ліпеня, пад вечар хрэсны ход увайшоў у Астравец. Пілігрымаў гасцінна прынялі на прыходзе храма Святых апосталаў Пятра і Паўла: арганізавалі вячэру і начлег. Госці памаліліся разам з настаяцелем царквы протаіерэем Георгіем Савіцкім і астраўчанамі на вячэрнім богаслужэнні, а назаўтра паўдзельнічалі ў літургіі. Пасля пранікнёнай сумеснай малітвы каардынатары ходу Мікалай Бондар і Аляксандр Несцярчук сардэчна падзякавалі айцу Георгію Савіцкаму і прыхаджанам за душэўны прыём.
Паломнікі з малітвай рушылі далей – праз Ашмяншчыну, Іўеўшчыну, Воранаўшчыну да Гродна, канечнага пункта маршруту. Шэсцьсот кіламетраў яны пераадолелі пехатой, але ніхто не скардзіўся на спёку і стому, бо ім дапамагалі святая апякунка Еўфрасіння і шчырая малітва.
Таіса СЯМЁНАВА
