Фотомгновения. Чем год минувший нам запомнится?

Разам з краінай

Сёлета Астравеччына разам з усёй краінай прыгожа, душэўна, з размахам адзначыла вялікае і светлае свята 70-годдзя Вялікай Перамогі: узгадала загінуўшых, павіншавала жывых ветэранаў вайны – у тым ліку і былога танкіста, удзельніка Сталінградскай бітвы Андрэя Андрэевіча Галагаева, які напярэдадні майскіх свят адзначыў сваё 95-годдзе.
А восенню мы выбіралі кіраўніка дзяржавы на бліжэйшыя пяць гадоў – і шматтысячнае астравецкае “Так” палітыцы міру і стабільнасці, якую праводзіць дзеючы Прэзідэнт Рэспублікі Беларусь, арганічна ўлілося ў агульную пераканаўчую перамогу на выбарах Аляксандра Рыгоравіча Лукашэнкі.

Напярэдадні выбараў Аляксандр Рыгоравіч Лукашэнка ў трэці раз наведаў наш раён. Адно з яго абяцанняў на сустрэчы з жыхарамі раёна – што ў Астраўцы з’явіцца фізкультурна-аздараўленчы комплекс з басейнам – павінна ажыццявіцца ў бліжэйшы час: як паведамілі рэспубліканскія СМІ, у наступным годзе распачнецца яго будаўніцтва.
Прадстаўнікі Астравеччыны прымалі актыўны ўдзел у Дні беларускага пісьменства, які праходзіў сёлета ў Шчучыне. Астравецкая самаробная кніга была прызнана лепшай, а спектакль мясцовых артыстаў па п’есе Ніны Рыбік “Калядны вечар” выклікаў захопленыя водгукі гледачоў.

Мы ў вобласці, вобласць -- у нас

Вясной на базе Астравецкага раёна прайшла прэс-канферэнцыя старшыні Гродзенскага аблвыканкама У.В. Краўцова з прадстаўнікамі сродкаў масавай інфармацыі вобласці. Дапытлівыя журналісты выказалі захапленне ўбачаным у нашым горадзе і раёне і асабліва – на будаўнічай пляцоўцы Беларускай АЭС.
Месцам правядзення традыцыйнай выставы-кірмашу “Паўночны вектар Гродзеншчыны” сёлета стала Астравеччына. Удзел у ёй прынялі не толькі асноўныя прадпрыемствы трох суседніх раёнаў – Астравецкага, Смаргонскага і Гродзенскага, – але і шматлікія замежныя госці.

З вялікім поспехам у нашым раёне прайшоў рэгіянальны фестываль традыцыйнай культуры “Скарбы Гродзеншчыны”, у якім прыняў удзел міністр культуры Рэспублікі Беларусь Барыс Святлоў. На фестывалі былі шырока прадстаўлены традыцыйныя беларускія рамёствы.

Будоўля стагоддзя

Нягледзячы на крызіс, які закрануў Расію і Беларусь, работа на галоўнай будаўнічай пляцоўцы краіны ідзе, не зніжаючы тэмпаў: як паведамлялася неаднойчы, узвядзенне Беларускай атамнай электрастанцыі вядзецца строга па графіку.
А галоўнай падзеяй адыходзячага года стала дастаўка пасля доўгага падарожжа рознымі відам транспарту на будаўнічую пляцоўку корпуса рэактара першага энергаблока.

Перамогі

Адыходзячы год быў багатым на дасягненні і перамогі: нашы дзеці і дарослыя, установы і арганізацыі перамагалі ў абласных, рэспубліканскіх і нават міжнародных конкурсах і спаборніцтвах, пацвярджаючы даўнюю ісціну, што Астравеччына багатая на таленавітых і працавітых людзей. І ўсё ж перамогай года можна лічыць званне чэмпіёна свету па пажарна-выратавальнаму спорту, якое ў складзе каманды Гродзенскай вобласці заваяваў супрацоўнік раённага аддзела па надзвычайных сітуацыях Максім Свіла.
А нашай агульнай перамогай стала першае месца Астраўца ў штогадовым рэспубліканскім аглядзе-конкурсе населеных пунктаў на лепшы санітарны стан і добраўпарадкаванне: наш горад у чарговы раз пацвердзіў сваё рэнамэ чыстага, прыгожага і ўтульнага горада.
Давайце ж усе разам падтрымліваць яго і надалей!

Наваселлі

Наш горад расце,развіваецца – і наваселлі ў жылых дамах і адміністрацыйных будынках сталі яго адметнай асаблівасцю. Сёлета ўведзены ў эксплуатацыю офісы раённага прадстаўніцтва “Белдзяржстраха”, следчага камітэта, прыватныя прадпрымальнікі завяршылі будаўніцтва гандлёвага цэнтра, якому далі адметную беларускую назву “Талер”. Напрыканцы года быў урачыста адкрыты першы ў раёне дом сямейнага тыпу.
Але самымі радаснымі і доўгачаканымі наваселлямі, безумоўна, сталі тыя, што справілі напачатку года ў новых сучасных будынках гімназія №1 і дзіцячы садок.

Ніна РЫБІК.