В Островецком районе приступили к уборке урожая
Жніво – апагей работы селяніна – распачалося ў Астравецкім раёне. Нягледзячы на зацяжную непагадзь, новы ўраджай залатымі струменьчыкамі ўжо сыплецца ў кузавы калгасных машын. Мелодыя жніва з дзяцінства знаёмая кожнаму вяскоўцу. Праводзячы позіркам зладжаную працэсію камбайнаў, якая рушыць да хлебных ніў праз вёску, услед ён жадае – услых ці ў думках: “З, Богам, хлопцы, вам працаваць!”
Сёлетнюю мелодыю жніва сапсавалі бясконцыя дажджы. Але, нягледзячы на слату, ва ўсіх гаспадарках раёна аграрыі трымаюць руку на пульсе, каб скарыстаць кожную хвіліну, вырваць у дажджоў саспелыя тоны зерня.Працаўнікі СВК “Варняны” аднымі з першых у раёне вывелі ў поле зернеўборачную тэхніку.
Вячаслаў Станіслававіч Бабарыка,памочнік камбайнера
Як паведамілі спецыялісты агранамічнага сектара ўпраў-лення сельскай гаспадаркі і харчавання, жніво пачалося два тыдні таму з абмалоту насеннікаў шматгадовых траў. Затым надышла чарга рапсу. У СВК “Варняны” і “Гервяты” ўжо распачалі ўборку зерневых, у прыватнасці, азімага трыцікале.
Дзмітрый Іосіфавіч Валанцэвіч, камбайнерУсяго ж па раёне па стане на 22 ліпеня ўбрана 210 гектараў азімага трыцікале з 3 189 пасеяных. “Першынец уборкі” даў на круг 40 цэнтнераў. Сваёй чаргі чакаюць авёс, пшаніца, жыта. Увогуле плошча зерневых і зернебабовых культур, якія трэба будзе сёлета ўбраць, складае 17 521 гектар.
Аляксандр Іванавіч Герасім,галоўны аграном
Пад рапсам, які вясной цешыў вока сваімі жоўтымі суквеццямі, занята 2 033 гектары, з якіх 1 030 гектараў ужо абмалочаны: аграрыі з уборкай крыжакветкавага справіліся амаль напалову. Ураджайнасць – 24,5 цэнтнера з гектара пры сярэднеабласных 22. Нехта, магчыма, скажа: малавата... Але на ўраджайнасць рапсу, асабліва ў паўночных раёнах, адмоўны ўплыў зрабіла надвор’е. Да прыкладу, нашы суседзі, ашмянцы, збіраюць яшчэ менш – па 13 цэнтнераў з гектара, а ў Іўеўскім раёне на круг увогуле выходзіць усяго пад 11 цэнтнераў з гектара.
Рапсавае поле ў СВК “Варняны” самае вялікае ў раёне – 660 гектараў.
– Рапс зараз убіраюць 4 зернеўборачныя камбайны, – расказвае галоўны аграном СВК “Варняны” Аляксандр Іванавіч Герасім. – На масавае жніво ў поле выйдуць 18 камбайнаў. На адвозцы зерня будзе задзейнічана больш за 15 адзінак тэхнікі.
Уладзімір Карлавіч Грынцэвіч,вадзіцель
Рабіць прагнозы новага ўраджаю галоўны тэхнолаг варнянскіх палёў адмаўляецца. Нават недасведчанаму ў аграноміі чалавеку зразумела, што сёлета ўраджай будзе меншы, чым летась. І прычыны відавочныя: калі, як паветра, была патрэбна вільгаць – сонца бязлітасна паліла і сушыла палеткі. Калі, нарэшце, надышоў час жніва – дажджы безупынку паліваюць зямлю. Што ж, год на год не прыходзіцца…
Тадэвуш Іванавіч Юркойць,камбайнер
– Вільготны сёлета рапс, – гаворыць камбайнер, пастаянны пераможца раённых спаборніцтваў на жніве Тадэвуш Іванавіч Юркойць. – Сухі яго лёгка абмалочваць, а зараз – складана. Але, каб усталявалася добрае надвор’е, а за намі справа не стане!
Рапс у сэнсе ўборкі наогул складаная культура: яго сцябліна не высыхае да канца, таму чысціць камбайн трэба па некалькі разоў за дзень, каб зерне не прасыпалася на зямлю, а трапіла ў кузавы МАЗаў.
Аляксандр Станіслававіч Кіндэр, вадзіцельСушыльная гаспадарка СВК “Варняны” знаходзіцца, што называецца, у поўнай баявой гатоўнасці: частка намалочанага рапсавага насення ўжо даведзена да кандыцыі і падрыхтавана для пастаўкі перапрацоўшчыкам.
Віктар Іванавіч Садоўскі, вадзіцельЁсць і паліва, і людзі, і тэхніка… Аднаго не стае на сёлетнім жніве – надвор’я. Праводзячы позіркам караван камбайнаў СВК “Варняны”, якія выйшлі ў поле толькі пасля абеду, у думках прашу: “Дай, Божа, пагоду!”
Андрэй Людвікавіч Лісоўскіз сельгастэхнікі дапамагае варнянцам на жніве
Віталь Анатольевіч Тумінскі, камбайнерІ няхай варнянская рапсодыя стане магутнай, зладжанай, прыгожай мелодыяй жніва, у якой не будзе дажджлівых нотак.
Казімір Уладзіслававіч Млынкоўскі працуе ў СВК “Варняны” з 70-х гадоў, 20 з іх – на камбайне. Механізатар упэўнены, што паспяховасць уборачнай кампаніі залежыць ад унёску кожнага працаўніка.
Валянцін Тадэвушавіч Тумінскі,памочнік камбайнера
КАМПЕТЭНТНА
Загадчык сектара раслінаводства ўпраўлення сельскай гаспадаркі і харчавання Віктар Багданавіч Чума:
– Да ўборачнай кампаніі прыступілі ўсе гаспадаркі раёна. Прагнозы на ўраджай-2016 рабіць пакуль рана, таму што ўборка толькі пачалася, але мінулагодніх рэкордных вынікаў сёлета мы дакладна не дасягнём. Сваю ролю адыграў прыродны фактар: з-за працяглага засушлівага надвор'я пацярпелі і травы, і рапс, і зерневыя культуры. Сёлета, у параўнанні з мінулым годам, амаль удвая менш было ўнесена ўгнаенняў – гэта таксама адмоўна адбілася на ўраджаі.
Тэкст і фота Алены ГАНУЛІЧ.
