Полным ходом идут посевные работы на полях СПК "Гервяты"

Давайце і мы адправімся па слядах “Расы”, і не толькі, у вандроўку па Гервятах. Але на гэты разне для таго, каб сузіраць велічна-ўзнёслы касцёл і рукатворную прыгажосць вакол яго, а ў эпіцэнтр вясенніх работ – на палі. Тым больш што экскурсавод падабраўся самы кампетэнтны – галоўны аграном СВК “Гервяты” Дзяніс Кірпа.

– У структуры вырошчвання культур асаблівых змяненняў не прадбачыцца, – па дарозе ўводзіць мяне ў курс спраў тэхнолаг палёў. – Стаўку робім на эканамічна выгадныя культуры. Да прыкладу, плошча пад цукровыя буракі павялічыцца на 50 гектараў, а кукурузы на зялёную масу – ажно на 340 гектараў. Яравы ячмень зойме 1 430 гектараў, а пшаніца – 600 гектараў. На 140 гектараў зменшым плошчы пад аўсом, а шматгадовыя травы будзем вырошчваць на 783 гектарах у параўнанні з мінулагоднімі 926 гектарамі.

Кароткі маналог Дзяніса Валер’евіча крыху агаломшыў. Чакала, што ён стане тэлефанаваць і ўдакладняць пэўныя лічбы, а выйшла ўсё “ад зубка”, без падглядкі ў нататнік. Адразу відаць: чалавек – на сваім месцы. Гэта пры тым, што для галоўнага агранома СВК “Гервяты” сёлетняя яравая пасяўная толькі трэцяя.

Прыпынак першы: палі бліз Чэхаў і Палестыны

Гервятцы ўзначальваюць раённую зводку па падкормцы азімых зерневых культур. Па стану на 25 сакавіка яны справіліся з даведзеным заданнем на 60 працэнтаў – а гэта значыць, што пасевы на 1 147 гектарах атрымалі такую неабходную ў гэты перыяд мінеральную падпітку. Азімы рапс пакуль не падкармлівае ніводная гаспадарка раёна, у тым ліку і СВК “Гервяты”, а вось шматгадовыя травы тут падкормлены на плошчы 478 гектараў, што складае 61 працэнт ад агульнай колькасці. Сенакосы і паша веснавую порцыю “мінералкі” атрымалі толькі на 9 працэнтаў.

Два лёгкія на першы позірк комплексы “Раса” за дзень здольны “распыліць” вадкія азотныя ўгнаенні на тэрыторыі да 200 гектараў.

Дарэчы, з заданнем па нарыхтоўцы арганікі пад яравую сяўбу гервятцы цалкам справіліся: на палі трапіла ўжо 81,3 тысяч тон (96 працэнтаў) угнаенняў.

Асновай асноў падрыхтоўкі глебы да вясенняй пасяўной застаецца культывацыя, дзякуючы якой  патрэбная для ўсходу насення вільгаць не выпараецца, а застаецца ў зямлі. Як прызнаецца заняты на культывацыі глебы механізатар Валерый Генрыхавіч Герасім, за змену апрацоўваецца да 30 гектараў поля – калі не здараецца форс-мажорных сітуацый.

У СВК “Гервяты” зараз падсяваюць бабовыя і бабова-злакавыя культуры. Насенне канюшыны і цімафееўкі апладніла 112 гектараў нівы з 614 запланаваных.

Сеялку СПУ-шку і яе “рулявога” мы заспелі падчас абеду. Смачны, а галоўнае – цёплы абед (і першае, другое і трэцяе) прывозяць працаўнікам, ад якіх залежыць будучы ўраджай, проста ў поле.

– Пры такім надвор’і ў кароткія тэрміны, без штогадовай спешкі завершым сяўбу ранніх зерневых і зернеба-бовых культур, – гаворыць галоўны аграном СВК “Гервяты” Дзяніс Валер’евіч Кірпа. – Сёння (24 сакавіка. – Заўв. аўт.) у нас задзейнічаны два пасяўныя агрэгаты. Калі і надалей усталюецца спрыяльная для пасяўной тэмпература, можна выпусціць і чатыры-пяць сеялак – тады, думаецца, справімся за 12 дзён і прыступім да сяўбы цукровых буракоў і кукурузы і пасадкі бульбы.

Дарэчы, на сяўбе яравых задзейнічаны вядомыя экіпажы: на трактары “МТЗ-3022”, абсталяваным спецыяльнай сеялкай АПП-6, працуе Валянцін Баляслававіч Танковіч, а Іван Генрыхавіч Алітойць засыпае насенне; на энергаёмістым “Джон-Дзіры”, які працуе ў счэпцы з камбінаваным глебаапрацоўчым і пасяўным агрэгатам “Амазонія”, у полі шчыруе Эдуард Мілэйша, партрэт якога неаднаразова заносіўся на Дошку гонару Астравецкага раёна і кааператыва.

– Нездарма нашы дзяды казалі: сей авёс у гразь – будзеш князь. Пад гэтай культурай занята ўжо 60 гектараў нівы з 70 запланаваных. А вось цеплалюбівіцу пшаніцу яшчэ не пачалі сеяць, – расказвае галоўны аграном. – Сёлета нас парадавалі і азімыя.  Давядзецца перасеяць толькі 126 гектараў рапсу.

Тым больш што і тэхніка, і людзі, са слоў Дзяніса Валер’евіча, да сяўбы яравых цалкам падрыхтаваныя, і з палівам няма ніякіх праблем.

Гервяцкая гаспадарка цалкам забяспечана пасяўным матэрыялам. Для сортаабнаўлення і сортазмены набываецца насенне элітных сартоў у Гудагаі, Скідзелі і іншых гаспадарках. А пратручваецца яно па меры неабходнасці: прыкладна 33 працэнты ад агульнай колькасці ўжо падрыхтавана да сяўбы.

Гаспадыня зернясховішча, насеннявод Антаніта Францаўна Дзерван ведае без падказкі спецыяльных таблічак, дзе ляжыць якое насенне.

СВК “Гервяты” – насенняводчая гаспадарка, якая займаецца вырошчваннем насення цімафееўкі, аўсяніцы і іншых траў, а пасля рэалізоўвае яго гаспадаркам праз сістэму “Аблнасентравы”.

– Пратруцілі і падрыхтавалі да пасяўной ужо каля 180 тон насення, – расказвае Антаніна Францаўна. – Для размнажэння сёлета закупім 45,7 тон піваварнага ячменю сартоў “Себасцьян” і “Кангу”.

– Пашанцавала мне з Францаўнай, – далучаецца да размовы Дзяніс Валер’евіч. – Яна – адна з самых вопытных аграномаў раёна…

Мудрасць аксакалаў і энергія маладых спецыялістаў утвараюць той тандэм, які можа зрушыць нават горы. Экскурсія па гервяцкіх нівах яшчэ раз пацвердзіла спрадвечную ісціну: гервятцы трымаюць курс не толькі на хуткасць сяўбы (тэрмінаў ніхто не адмяняў!), але і на якасць будучага ўраджаю.