Верят ли островчане в чудодейственную силу крещенской воды?
10:08 / 20.01.2018
Аднак галоўны сэнс не ў тым, каб у гэтыя дні ўзяць вады, а ў тым, каб памаліцца падчас яе асвячэння, папрысутнічаць на набажэнстве, бо Гасподзь дае ласку для лячэння святой вадой хвароб менавіта па малітве.
Што пра цудадзейнасць вады ў гэтыя дні думаюць астраўчане, высвятляў наш карэспандэнт у жыхароў і гасцей горада.
Аляксандр Чуракоў, мантажнік:
– Я веру ў цудадзейнасць блаславёнай у гэтыя дні вады. І сам акунаюся на Вадохрышча. Не кожны год атрымліваецца гэта зрабіць, але па меры магчымасці ўваходжу ў купель.
Што трэба, каб рашыцца на гэты крок? Найперш, вядома, вера. Я не раз бачыў, як людзі падыходзілі да купелі, распраналіся – а вось акунуцца не змаглі.
Павел Галактыёнаў, інжынер:
– Калі сын быў маленькі, то ўвесь час плакаў, а як сталі ўмываць яго святой вадой – паспакайнеў.
Каб акунацца ў купель, лічу, трэба мець моцную веру і сілу волі. Многія мае знаёмыя і сябры на Вадохрышча ныраюць – і ніхто ніколі не захварэў, не прастыў. Я ў купель акунаўся, аднак у мароз – ні разу. Можа, калі-небудзь рашуся на гэты крок.
Таісія Папяльніцкая, пенсіянерка:
– Хоць у нас, католікаў, і няма свята Вадохрышча, аднак усе мы ходзім пад адным небам і пад адным Богам: як ён нас накіруе, які лёс дасць – так і жывём. Таму не бачу нічога дрэннага ў сумесным святкаванні хрысціянскіх святаў.
У мяне шмат сяброў праваслаўных, і сама я неаднойчы была ў астравецкай царкве. Наконт вады лічу так: можа, якая сіла цудадзейная ў ёй і ёсць, можа, яна сапраўды гаючая ды лячэбная, аднак справа тут не ў вадзе, а ў веры, з якой чалавек яе ўжывае.
Любоў Пятровіч, пенсіянерка:
– Я – праваслаўная, а муж у мяне – католік, таму хаджу і ў царкву, і ў касцёл.
У цудадзейнасць святой вады я не верыла, пакуль мая ўнучка не атрымала кватэру. Аднойчы патэлефанавала і кажа: «Такое ўражанне, што нехта па начах па кватэры ходзіць... Страшна!» Я ёй дала святой вады, яна ёй кватэру пакрапіла – і ўсё прайшло.
Віталь Грабоўскі, будаўнік:
– Напэўна, нешта ў крашчэнскай вадзе ёсць. Некаторыя мае знаёмыя акуналіся і гаварылі,
што ім сапраўды лягчэй станавілася на душы – адчуваеш сябе чыстым не толькі целам, але і душою. Аднак рабіць гэта трэба з верай, бо без яе гэта – проста загартоўванне, а не ачышчэнне.
Аднак, калі ваша здароўе падводзіць, то лепш ад акунанняў устрымацца…