А якую кнігу вы прачыталі апошняй? Спадзяёмся не "Буквар"...
Штогод у першую нядзелю верасня ў нашай краіне адзначаецца Дзень беларускага пісьменства – свята друкаванай кнігі.
З гэтай нагоды карэспандэнт «АП» высвятляў у жыхароў і гасцей раёна, якую кнігу яны прачыталі апошняй і ці любяць чытаць увогуле.
Яніна Забагонская, пенсіянерка: 
– Я з дзяцінства люблю чытаць – сама навучылася ў маленстве. У нас дома кніг было няшмат, таму я стала частай госцяй у мясцовай бібліятэцы. Якая гэта была радасць, калі новую кніжку брала!
Чытаю шмат і цяпер – і беларускія, і рускія кнігі. З апошняга прачытанага ў душу запала аповесць Алены Васілевіч «Пачакай, затрымайся…»
А вось сучасныя дзеці да кніг не вельмі ахвочыя – напэўна, лянуюцца, ім за камп’ютарам прасцей. Унучку ўсё лета «далучала» да кнігі – здаецца, зацікавіла.
Максім Рэгель, начальнік аддзела райспажыўтаварыства, з сынам Мацвеем:
Мацвей:
– Апошняе, што чытаў, – арабскія казкі. Я не люблю чытаць – гэта нецікава, мне больш падабаецца гуляць у планшэце. Аднак тата не ўключае мульцікі, пакуль я не прачытаю хаця б некалькі старонак.
Максім:
– Апошняя кніга, якую я чытаў, «Інжынерна-тэхнічная дакументацыя». Але гэта па справах фірмы. А для душы даўно нічога не атрымліваецца пачытаць. Хіба што ў мінулым годзе, калі ляжаў у бальніцы, перачытаў «Майстра і Маргарыту» Булгакава.
Увогуле аддаю перавагу рускім аўтарам і раю ўсім для абавязковага прачытання Булгакава і Гогаля. З замежных пісьменнікаў мне вельмі падабаецца Сцівен Кінг.
Анжэліка Масойць, студэнтка Полацкага дзяржаўнага ляснога каледжа, і Карына Сяўрыс, студэнтка
БДПУ імя М. Танка:
Анжэліка:
– Мне вельмі падабаецца беларуская літаратура. Мая любімая кніга – «Сэрца на далоні» Івана Шамякіна – лічу, што яе павінен прачытаць кожны.
Апошняе, што трапіла мне ў рукі, – «Алхімік» Паўла Каэльё.
На жаль, цяпер чытаю мала. Большасць з прачытанага – спецыялізаваная літаратура: «Лясная этымалогія», «Біялогія лясных звяроў і птушак» і іншае.
Карына:
– Мне складана знайсці час, каб пачытаць нешта для сябе: увесь час займае вучоба, падрыхтоўка да заняткаў. Да таго ж трэба яшчэ і ў сацыяльных сетках «павісець». А яшчэ для самаразвіцця я запісалася на курсы жэставай мовы.
З апошніх прачытаных твораў мне вельмі спадабаліся «Гульня Эндера» Орсана Скота Карда, «Тры таварышы» Эрыха Марыі Рэмарка, «Дзікая» Шэрыл Стрэйд.
Антон ЧЫК, фота аўтара.
