Зимний сезон боксёры из Островца начали с побед
Паспаборнічаць на рынгу ў майстэрстве бою сабраліся 113 удзельнікаў. Такой колькасцю можа пахваліцца нават не кожнае абласное спаборніцтва, што яшчэ раз даказвае: баксёры – трэнеры і іх выхаванцы, выказалі глыбокую павагу да памяці былога баксёра.
Астравецкую дэлегацыю прадстаўлялі сем чалавек. У вагавой катэгорыі да 38,5 кілаграма выступаў Дзіма Відута, які ўдзельнічаў на турніры падобнага маштабу ўпершыню. Ён добра правёў бой, але перавага аказалася на баку саперніка.
Арцём Каспяровіч і Саша Філіповіч выступалі ў адной вагавой катэгорыі – да 48 кілаграмаў. Абодва выйгралі па два баі і ў выніку аказаліся ў фінале, дзе на рынгу змагаліся ўжо паміж сабой. Бой аказаўся цікавым і відовішчным. У гэтым нялёгкім для хлопцаў паядынку мацнейшым стаў Саша Філіповіч, хоць Арцём Каспяровіч нічым не ўступаў таварышу і таксама прадэманстраваў выдатныя баксёрскія навыкі. У любым выпадку, дзякуючы рабятам сярэбраны і залаты медалі ўвайшлі ў лік нашых перамог.
У вагавой катэгорыі да 72 кілаграмаў выступаў Вадзім Мароз. Юнак выйграў першы бой, а вось у другім яго сапернікам быў пераможца чэмпіянату Беларусі, удзельнік першынства Еўропы, які аказаўся крыху мацнейшым за астраўчаніна і ў выніку стаў пераможцам. Вадзім Мароз – сярэбраны прызёр турніру.
Яшчэ двое астраўчан – Мікіта Ромаш і Саша Грынчук – выступалі ў вагавой катэгорыі да 46 кілаграмаў. Мікіта правёў добры бой, але суддзі аддалі перавагу саперніку. Саша Грынчук без асаблівых цяжкасцей выйграў першы бой і быў настроены перамагаць і далей, што і прадэманстраваў дакладнымі ўдарамі і бездакорнай тэхнікай бою падчас другога паядынку. Аднак суддзі прызналі перамогу саперніка. Саша Грынчук стаў сярэбраным прызёрам.
На мясцовага баксёра “нарваўся” і Дзіма Хадорскі, вагавая катэгорыя да 63 кілаграмаў. Праўда, перад гэтым астраўчанін з яўнай перавагай выйграў першы бой. Упэўнена і рашуча выступаў юнак і падчас другога паядынку. Але суддзі зноў вырашылі падтрымаць “свайго” баксёра, якому і прысудзілі першае месца. Наш Дзіма атрымаў “серабро”.
----------------------------
Марына МАЦКЕВІЧ.