Кіраўнікі арганізацый пазнаёміліся з работай фізкультурна-аздараўленчага комплекса
11:08 / 28.01.2019
– Раней не раз падчас сустрэч з насельніцтвам даводзілася чуць просьбы пабудаваць басейн, адкрыць новую трэнажорную залу. У юбілейны дзень горада мы атрымалі цудоўны падарунак – новы фізкультурна-аздараўленчы комплекс. Здаецца, што яшчэ трэба? Ідзі – адпачывай, аздараўлівайся! – разважае Ірына Тальчук. – Якім жа было маё здзіўленне, калі аказалася, што многія кіраўнікі ні разу не былі на новым аб’екце.
І Ірына Эдуардаўна вырашыла выправіць гэтую недаравальную памылку, запрасіўшы кіраўнікоў прадпрыемстваў, арганізацый і ўстаноў, дэпутатаў раённага Савета дэпутатаў на экскурсію ў новы фізкультурна-аздараўленчы комплекс.
Дырэктар гэтай установы Таццяна Баранава з гатоўнасцю пазнаёміла са сваёй «гаспадаркай»: мужчынскае і жаночае аддзяленні лазні з двума басейнамі, саўна, басейн для плавання, трэнажорная і спартыўная залы, масажны кабінет, цырульня і кафэ – адпачыць і ўмацаваць здароўе тут можна па поўнай праграме. Галоўнае – мець жаданне!
Таму хопіць доўгія зімовыя вечары праводзіць у тэлевізары ці камп’ютары: адкладваем усе справы – і адпраўляемся ў новы фізкультурна-аздараўленчы комплекс за здароўем!