Чым закончылася рыбалка для двух жыхароў Астравецкага раёна?
Гэтая гісторыя адбылася летась нічым не адметным познім восеньскім вечарам, калі двое жыхароў вёскі Быстрыца Астравецкага раёна вырашылі парыбачыць на Віліі, якая працякае побач.
І сталі б яны аднымі са шматлікіх рыбаловаў, што бавяць вольны час на беразе з вудай і мараць аб добрай паклёўцы, калі б не цяга да хуткай нажывы. Вудаў рыбакам падалося мала, таму яны, сеўшы ў драўляную лодку, прыхапілі з сабой рыбалоўную сетку, якая з’яўляецца забароненай прыладай рыбалоўства. У парушэнне п. 140.2 Правіл вядзення рыбалоўнай гаспадаркі і рыбалоўства, якi забараняе аматарскае рыбалоўства прыладамі з сеткавых матэрыялаў і з плавальных сродкаў у цёмны час сутак, мужчыны ажыццявілі незаконную здабычу рачной рыбы.
Супрацоўнікі Астравецкага РАУС i раённай інспекцыі прыродных рэсурсаў і аховы навакольнага асяроддзя, якiя затрымалі браканьераў, налiчылi ў іх злоўленую 201рыбiну агульнай вагой 13 кілаграмаў 650 грамаў, сярод якой былі плотка рачная, лінь, шчупак, келба, ялец і акунь. Памер урону, прычыненага незаконнай здабычай рыбы, склаў 4 119 500 рублёў — 117,7 базавых велічынь.
Працяг гэтай гісторыі меў заканамерны, хоць і даволі нечаканы для браканьераў, вынік. Прыгаворам суда Астравецкага раёна ад 18 лютага 2011 года жыхары вёскi Быстрыца М. і С. прызнаныя вінаватымі ў здабычы рыбы ў забаронены час, забароненымі прыладамі лоўлі (незаконнай здабычы рыбы), што пацягнула прычыненне ўрону ў асабліва буйным памеры, і на падставе ч. 4 арт. 281 Крымінальнага кодэкса Рэспублікі Беларусь асуджаны да пакарання ў выглядзе пазбаўлення волі тэрмінам на 1 год 6 месяцаў з адбываннем пакарання ў выпраўленчай калоніі ва ўмовах агульнага рэжыму.
Неабходна ведаць, што прадугледжанай ч.4 арт.281 Крымінальнага кодэкса асабліва буйным прызнаецца урон, які ў сто і больш разоў перавышае памер базавай велічыні (на сённяшні дзень адна базавая велічыня складае 35000 рублёў). Памер урону вылічваецца, зыходзячы з устаноўленных Указам Прэзiдэнта Республiкi Беларусь ад 8 снежня 2005 г. №580 таксаў для пакрыцця прычыненага ўрону на дзень здзяйснення злачынства. Прычым таксы ўстанаўліваюцца ў залежнасці ад вiду рыбы ў памеры ад 0,05 да 5 базавых велічынь за 1 рыбiну незалежна ад яе вагі і памеру.
Нягледзячы на довады абвінавачваемых аб тым, што яны не ведалі пра забарону аматарскага рыбалоўства з выкарыстаннем сеткі, суд палічыў, што гэта з’яўляецца агульнавядомым i відавочным для абодвух браканьераў.
Важна ведаць, што ў адпаведнасці з заканадаўствам ухіленне вінаватымі асобамі наступстваў здзейсненага парушэння і прывядзенне прыроднага аб’екта ў першапачатковы стан (да прыкладу, вяртанне злоўленай рыбы назад у раку цi вадаём) не з’яўляецца падставай для вызвалення іх ад устаноўленай законам адказнасці.
Дзмiтрый ДАМАРАД, намеснiк пракурора Астравецкага раёна.