Решается судьба районных бань

Асноўным пытаннем, якое разглядалася па пасяджэнні райвыканкама, было якаснае аказанне жыхарам раёна паслуг лазні.

Па інфармацыі дырэктара Астравецкага РУП ЖКГ Аляксандра Мекіна, нізкая наведвальнасць як сельскіх, так і гарадской лазняў прыводзіць да іх нерэнтабельнасці. Хоць некаторыя з іх былі адрамантаваны, жадаючых памыцца больш не стала, за выключэннем хіба што лазні ў Гервятах.

Галоўны санітарны ўрач раёна Йонас Таль адзначыў, што і ў іншых лазнях – у прыватнасці, у Падольцах і Астраўцы – да канца бягучага года неабходна зрабіць рамонт: гэтага патрабуюць санітарна-гігіенічныя нормы.

У дадатак старшыня раённага Савета дэпутатаў Ірына Тальчук перадала пажаданне жыхароў аграгарадка Падольцы ні ў якім разе не зачыняць мясцовую лазню: нават у «падношаным» стане яна запатрабавана.

– Урад унёс паслугі лазні ў пералік сацыяльна-значных: людзі павінны мець магчымасць памыцца, – сказаў старшыня райвыканкама Ігар Шалудзін. – Таму мы павінны зрабіць так, каб работа лазняў перастала быць стратнай.

Зрабіць гэта можна, па меркаванні старшыні райвыканкама, нарошчваннем загрузкі і зніжэннем затрат на іх ўтрыманне.

Шмат варыянтаў рашэння праблемы было выказана на пасяджэнні райвыканкама, сярод якіх асабліва цікавым падаліся прапановы па арганізацыі падвозу людзей з іншых населеных пунктаў, пашырэнне ў лязнях аздараўленчых паслуг і выкарыстанне перасоўнай лазні.

Старшыня райвыканкама даручыў спецыялістам жыллёва-камунальнай гаспадаркі разгледзець усе прапанаваныя магчымасці, вывучыць вопыт работы перасоўнай лазні ў Шчучынскім раёне.

А пакуль што райвыканкам вырашыў ў лазнях, што знаходзяцца на балансе ЖКГ, поўнасцю вызваліць ад аплаты за мыццё ўдзельнікаў і інвалідаў Вялікай Айчыннай вайны, шматдзетныя сем’і пры наяўнасці адпаведнага пасведчання і дзяцей да трох гадоў, на 50% кошту – інвалідаў 1 і 2 групы і дзяцей да сямі гадоў.