Што аб’яднала вучняў Спондаўскага НПК і журналістаў часопіса «Юны выратавальнік»
16:49 / 28.11.2019
А ўсё таму, што са старонак выдання можна ўзяць шмат карыснай інфармацыі пра бяспеку паводзін, гісторыю ўзнікнення розных прафесій, гераічныя ўчынкі выратавальнікаў і пра цікавыя мясціны нашай краіны.
А як здорава разгадваць красворды, шукаць адказы на пытанні віктарын, выконваць рэдакцыйныя заданні, маляваць і складаць вершы! Дзеці неаднаразова атрымлівалі ўзнагароды за правільныя адказы і творчыя работы.
Нядаўна спондаўскіх школьнікаў запрасілі на сустрэчу з супрацоўнікамі часопіса. Спатканне адбылося ў актавай зале Варнянскага НПК.
З рук выпускаючага рэдактара «Юнага выратавальніка» Святланы Ламавой вучні атрымалі спецыяльны падарунак за актыўнае супрацоўніцтва з выданнем. І самі перадалі работнікам рэдакцыі сувеніры, зробленыя сваімі рукамі.
Цікава, творча і весела праляцелі паўтары гадзіны. Уся зала дружна адказвала на пытанні, кожны хацеў паўдзельнічаць у конкурсах, імкнуўся праявіць эрудыцыю – і атрымаць прыз з сімволікай часопіса.
Школьнікі прымяралі касцюм пажарнага, вызначалі бяспечныя і небяспечныя сітуацыі, спявалі і танцавалі. Атрымалася сапраўднае свята. Дзякуй часопісу за сустрэчу! І будзем сябраваць надалей!
Аляксандра ПАМЕЦЬКА,
вучаніца Спондаўскага НПК