Школы и детские сады Островецкого района к новому учебному году готовы
10:38 / 21.08.2017
1
На працягу трох дзён камісія, якую ўзначаліў намеснік старшыні Астравецкага райвыканкама Віктар Збігневіч Свіла, наведала ўсе ўстановы адукацыі і вынесла вердыкт: гатовы да прыёму дзяцей.
У адзін з рэйдаў па школах адправіўся і карэспандэнт «Астравецкай праўды». Пра тое, што ўразіла і зацікавіла, – у нашым рэпартажы.
Першым своеасаблівы экзамен перад высокай камісіяй трымаў Мальскі дзіцячы сад-пачатковая школа. Капітальны рамонт тут прайшоў у 2008 годзе. З таго часу штогод тэрыторыю і будынак толькі падфарбоўваюць і абнаўляюць.
Колькасць маленькіх жыхароў установы павялічваецца. Сёлета садок наведваюць 45 дзяцей, у школу ходзяць 17 вучняў, але рэзервы ёсць – і пры жаданні бацькі могуць прывесці дзяцей у Малі.
Свежы пах фарбы, яркія кветкі, чысціня і ўтульнасць – здаецца, камісія задаволена. Не хаваюць радасці ад таго, што школа гатова да 1 верасня, дырэктар ды настаўнікі.
Варнянскія педагогі таксама сустракаюць камісію з добрым настроем. Што падабаецца ў гэтай школе – мноства кветак: агромністыя фікусы, юкі, драцэны – пазайздросціць можа нават батанічны сад.
І калі дашкольнікі ўжо запоўнілі гоманам і смехам групавыя пакоі – дзеці малююць, гуляюць з цацкамі, бавяцца на спартыўных пляцоўках, то класы пакуль стаяць у цішыні і чакаюць 1 верасня. Толькі настаўнікі, якія ўжо выйшлі з адпачынку, пераглядваюць праграмы і падручнікі.
Побач са школай размяшчаецца сацыяльна-педагагічны цэнтр. Сёлета і тут з’явілася «абноўка»: новая гульнявая пляцоўка, якая парадуе дзяцей. На працягу лета ў сацыяльным прытулку жыло шэсць выхаванцаў, цяпер засталося двое – і таму ў пакоях пануе цішыня. Касметычны рамонт, які зрабілі ва ўстанове, дадаў памяшканням утульнасці. Толькі бацькоўскую любоў, якой не хапае дзецям, што вымушаны знаходзіцца ў СПЦ, гэтым не заменіш.
– Сёлета мы адрамантавалі дах. Абнавілі плітку ў санвузлах, пафарбавалі сцены, падлогу, мэблю, – расказвае дырэктар СПЦ Таццяна Уладзіславаўна Калтан. – Стала больш утульна. Аднак ёсць і праблемныя пытанні, вырашыць якія самастойна нам не па сілах. Хацелася б добраўпарадкаваць тэрыторыю сацыяльна-педагагічнага цэнтра: асфальт увесь у ямінах, а яго рамонт нам не асіліць.
Зялёнымі прыгожымі туямі, рознаквеццем, каляровымі фарбамі і цікавымі гульнявымі куточкамі сустракае «экзаменатараў» Варонскі дзіцячы сад-пачатковая школа. Тут ёсць чым здзівіць і пахваліцца. Пасля таго, як закрылі Трокеніцкі дзіцячы сад, яго выхаванцы «пераехалі» ў Варону. Разам з імі на падвор’е «перасяліліся» і туі: перасадзілі іх у чэрвені – і ўжо відаць, што расліны прыжыліся.
Аднак больш за ўсё здзівілі і парадавалі гульнявыя пляцоўкі: драўляны паравозік з вагончыкамі, столік з табурэтамі, размаляваныя пад божых каровак, незвычайная пясочніца на стале – дзеці могуць наляпіць «бабак» і тут жа мыць рукі.
Годныя ўмовы створаны для дзяцей у школе і садку – усе чыста і акуратна.
– На падрыхтоўку школы да пачатку навучальнага года зрасходавана 13 327 рублёў, з іх 5 345 рублёў выдзелена з бюджэта, астатнія – спонсарскія сродкі, – расказвае дырэктар школы Людміла Станіславаўна Сасноўская. – Хочацца, каб у дзяцей і педагогаў былі годныя ўмовы для вучобы і работы.
І адміністрацыя пры падтрымцы аддзела адукацыі, спорту і турызму і Астравецкага райвыканкама стараецца іх ствараць. Яшчэ падчас вучэбнага года былі распачаты работы па рамонце спартыўнай залы: тут замянілі вокны і дзверы, выраўнялі сцены і зрабілі падлогу. Але наперадзе яшчэ нямала спраў, галоўная з якіх – рамонт даху над спартыўнай залай.
– Варонская школа – адна з тых, у якую можна і трэба ўкладваць грошы, – адзначае намеснік старшыні райвыканкама Віктар Збігневіч Свіла. – Падставы сур’ёзныя: садок наведваюць 33 дашкольнікі, 52 вучні сядуць 1 верасня за школьныя парты.
На працягу дня камісія наведвала яшчэ некалькі навучальных устаноў, кожны з яе ўдзельнікаў зрабіў заўвагі, якія напрыканцы дня былі абмеркаваны: да пачатку навучальнага года неабходна выправіць памылкі ці дарабіць тое, што, магчыма, не заўважылі ці не паспелі дарабіць педагогі і работнікі ўстановы.
Усе школы паспяхова здалі своеасаблівы экзамен, які пацвердзіў: 1 верасня школьнікі і дашкольнікі прыйдуць у падрыхтаваныя школы і садкі.
Алена ЯРАШЭВІЧ, фота аўтара.
ostrov-red.yaroshevich@tut.by