В островецком детском саду работает школа для мам и малышей
11:46 / 06.12.2019
– Да нас прыходзяць мамы з малышамі ад 1,5 да 3 гадоў, якія не наведваюць дзіцячы сад, – расказвае педагогпсіхолаг Ганна Пузырова. – Праз работу «Мацярынскай школы» мы папярэджваем магчымы стрэс, якім часта суправаджаюцца першыя дні і нават месяцы знаходжання выхаванцаў у садку.
Ганна Пузырова з выхаванцамі
Гэта незвычайная школа ўжо мае «выпускнікоў» – і, па словах педагогаў, іх сацыялізацыя і адаптацыя ў садаўскіх сценах прайшла паспяхова.
Цяпер школу наведвае дзевяць сямейных дуэтаў. Заняткі доўжацца гадзіну і праводзяцца два разы на тыдзень. З «вучнямі» займаюцца псіхолаг, музычны кіраўнік, кіраўнік па фізічнаму выхаванню і дэфектолаг.
Пры гэтым мамы – актыўныя ўдзельнікі адукацыйнага працэсу.
– Мы ўсё робім разам: танцуем, гуляем, лепім, малюем, займаем ся фізкультурай, – гаворыць Вольга Свадкоўская, маці двухгадовай Паліны.
Вольга Свадкоўская з дачкой Палінай
– Дачка з ахвотай ідзе сюды, і слова «сад» яе не палохае. Думаю, з дапамогай гэтай школы адаптацыя майго дзіцяці пройдзе паспяхова.
Так, забаўляючыся і дапамагаючы малышам выконваць заданні выхавацеляў, маці таксама вучацца – выхоўваць, тлумачыць, гуляць, падаваць прыклад. Да слова, у садку бацькі могуць атрымаць кансультацыю педагогаў – і гэтай магчымасцю яны карыстаюцца.
– Комплексны падыход да правядзення заняткаў спрыяе пазнавальнаму, фізічнаму, эстэтычнаму развіццю дзіцяці, – тлумачыць псіхолаг. – Да таго ж устанаўліваюцца партнёрскія адносіны з сем’ямі будучых выхаванцаў, у бацькоў пашыраюцца тэарэтычныя і практычныя веды па выхаванню дзяцей.
– Майму Глебу 1,9 года. Я прывяла сына на заняткі, каб потым яму было прасцей адаптавацца ў садку. Прыйшлі сюды нядаўна, і нам падабаецца, – дзеліцца Тамара Сайко. – Дзеці вучацца ўзаемадзейнічаць паміж сабой і з дарослымі. Асобна мы займаемся ў пакоі псіхалагічнай разгрузкі і ў фізкультурнай зале. «Урокі» хутка змяняюцца адзін другім – і гэта падтрымлівае цікавасць да іх.
Так незвычайна, праз сумесныя заняткі дзяцей, іх мам і выхавацеляў, пракладваецца шлях у дзіцячы сад – без слёз, угаворванняў і істэрык.