«Не забірай мяне так рана...» - просяць бацькоў выхаванцы ДЦРД
Трэці год запар Дашкольны цэнтр развіцця дзіцяці становіцца пераможцам раённага конкурсу на лепшую арганізацыю работы ўстаноў адукацыі. Як дасягнуць такога выніку і, галоўнае, як зацікавіць дзяцей і бацькоў быць не староннімі назіральнікамі, а ўдзельнікамі адукацыйнага працэсу ў садку?
Пра гэта мы гаварылі з загадчыцай ДЦРД №1 Аленай Пятроўнай Васільчык.
Два гады назад Дашкольны цэнтр развіцця дзіцяці №1 адзначыў трыццацігадовы юбілей – у час стварэння гэта была самая маладая ўстанова ў Астраўцы. Не паспелі азірнуцца, а за гэты час у горадзе адкрыліся яшчэ два садкі ў новых мікрараёнах. Канешне, колькасць дзяцей, якія наведваюць ДЦРД №1, зменшылася, аднак іх па-ранейшаму шмат.
Жанна Адольфаўна Змітровіч са сваімі выхаванцамі
Заходзіш у дашкольны цэнтр – і адразу трапляеш у палон фарбаў, дзіцячых дапытлівых вачанят і ўсмешак педагогаў. Кожны з іх – артыст, мастак і майстар на ўсе рукі. Аднак галоўны іх талент – бязмежная любоў да дзяцей. Без гэтага ў прафесіі выхавацеля доўга не затрымліваюцца.
Данута Вітольдаўна Тумкевіч да любой справы падыходзіць творча
Такіх, адданых садку і дашкольнікам, тут шмат – некаторыя працуюць з дня адкрыцця ясляў-сада. Але і тыя, хто прыходзіць у садок на адпрацоўку, – у большасці сваёй застаюцца.
– Калектыў дашкольнага цэнтра вялікі: у нас працуе 63 чалавекі, 29 з іх – педагогі, – расказвае Алена Пятроўна.
Выхавацелі і іх памочнікі, музычныя кіраўнікі, дэфектолагі і псіхолагі, кіраўнікі фізічнага выхавання, прыбіральшчыцы, рабочыя і повары – кожны стараецца зрабіць так, каб выхаванцам было ўтульна, цікава і добра.
З Таццянай Анатольеўнай Санюкевіч можна і спяваць, і танцаваць
– Нашу працу трэці год запар высока ацэньвае кіраўніцтва аддзела адукацыі, спорту і турызму, як вынік – перамога ў раённым конкурсе на лепшую арганізацыю работы. Але галоўная ацэнка нашай дзейнасці – шчаслівыя вочкі дзяцей і ўдзячнасць іх бацькоў, – упэўнена Алена Пятроўна.
Кожную раніцу 233 дашкольнікі спяшаюцца ў садок. Працуе ён з 7.30, але ёсць магчымасць прывесці дзяцей і раней – з 7.00 тут арганізавана дзяжурная група.
Загадчыца дашкольнага цэнтра Алена Пятроўна Васільчык са сваімі намеснікамі Алёнай Анатольеўнай Ляховіч і Тарэсай Станіславаўнай Чарнушэвіч і выхавацелем-метадыстам Жаннай Раманаўнай Кузняцовай
– Папулярнасцю карыстаецца і санаторная група, – расказвае Алена Пятроўна. – Тут дзеці не толькі атрымліваюць ўзмоцненае харчаванне, але і ходзяць на дадатковыя заняткі па фізічнай культуры, загартоўваюцца, знаходзяцца пад назіраннем педыятра Вікторыі Казіміраўны Страцэўскай. Група папулярная яшчэ і таму, што працуе яна з сямі гадзін раніцы да сямі гадзін вечара.
На прафілактыку захворванняў і здароўезберажэнне накіраваны дабрачынны праект «Мы – за здаровы лад жыцця». Яго ўкараненнем пры падтрымцы АТ інжынірынгавай кампаніі «Атамбудэкспарт» у садку будуць займацца сёлета.
На ўзбраенні педагога-псіхолага Таццяны Рыгораўны Тарашкевіч пясочная тэрапія
А пакуль дашкольнікі актыўнічаюць на занятках – восень спрыяе развіццю творчых здольнасцей. Калі мы завіталі ў садок, у адной групе дзеці малявалі восеньскі букет, у другой – развучвалі танец, у трэцяй – «збіралі» садавіну і агародніну… Цікава і пазнавальна было нават мне – а што гаварыць пра малых?! Дарэчы, у 3 групах з 12 дзеці павіталіся са мной па-беларуску: навучальны працэс тут вядзецца на роднай мове. Прыемна!
Весела і пазітыўна праходзяць заняткі ў кіраўніка фізвыхавання Вольгі Аляксандраўны Грачанік
– Зноў мяне так рана забіраеш? – чую голас хлопчыка. – Я яшчэ не нагуляўся – а мне ўжо пара дамоў…
І гэтыя словы – найлепшае пацвярджэнне таго, што дзецям тут добра. А гэта найлепшая адзнака выхавацелю за яго працу!
Аксана Іосіфаўна Юхно працуе з самымі маленькімі «чамучкамі»
Індывідуальныя заняткі з педагогам-дэфектолагам Мартай Віктараўнай Пяшкур