Коллекционеры Островетчины. Историю расскажут топоры
Віталій Іванавіч Лянкевіч, былы дырэктар Гудагайскай сярэдняй школы, які зараз знаходзіцца на заслужаным адпачынку, калекцыянерам сябе не лічыць. Проста ён, ад прыроды чалавек гаспадарлівы, любіць розны гаспадарчы рыштунак, усялякія інструменты – і ні з адным з іх не можа развітацца. А як гісторык – па адукацыі і па стылі жыцця (вельмі ж любіць “збіраць” і расказваць розныя байкі, жыццёвыя і не толькі), пра кожны свой інструмент ведае нейкую гісторыю. Вось і атрымліваецца, што калекцыя ў яго – з гісторыяй.
Самая значная і цікавая частка калекцыі Віталія Іванавіча Лянкевіча – сякеры. Іх у яго – ажно сямнаццаць. І ўсе рабочыя: адна – дровы секчы (хоць і газавае ацяпленне зараз у доме, але ж ці мала што…), другая ў машыне ляжыць – а раптам што ў дарозе здарыцца, трэцяя для турыстычных паходаў прызначана – сыны прыязджаюць, Вадзім – той вялікі аматар вандровак… Кожны экспанат гэтай своеасаблівай калекцыі хоць сёння можна браць у работу.
І пры гэтым усе яны – нібы з выставы: акуратныя, дагледжаныя… І ў кожнай – свая гісторыя.
– Вось гэтыя дзве сякеры – майго дзеда Рафала, твайго, значыцца, прапрадзеда, – расказвае Віталій Іванавіч унучцы Ксеніі сямейныя паданні. – Ім ужо больш за сто гадоў. Яшчэ ў Першую сусветную вайну, калі немцы пакідалі гэтыя мясціны, вясковыя мужыкі “пад шумок” расцягвалі іх акупанцкую гаспадарку. Вось і дзед Рафал з мужыкамі вырашылі сцягнуць з нямецкай электрастанцыі – была тады такая ў Сяржантах, выпрацоўвала электрычны ток, дзіва дзіўнае для таго часу – жалезны вал. Ужо валаклі гэты вал да падводы – каня пакінулі на ўскрайку лесу – як тут над самым вухам: “Хэндэ хох!” Немец з вінтоўкай! Мужыкі не разгубіліся, сталі прасіцца. Хто што меў – бутэльку там, каўбасу, яйкі – германцу аддалі. Дык той так узрадаваўся – вядома, нашто яму тая жалязяка, калі трэба ўцякаць з гэтай чужыны, што вінтоўку пад елку паставіў і кінуўся дапамагаць мужыкам той вал цягнуць. А тыя не ведаюць, як ад той дапамогі адмовіцца: непадалёк жа конь стаіць, убачыць акупант, што жарабец спраўны – забярэ, тут ужо яйкамі не адкупішся, ім жа ўцякаць на кані спрытней, чым пешшу. Ледзьве мужыкі адкараскаліся ад той дапамогі…
– А з таго жалезнага вала затым зрабілі гэтыя вось сякеры, – працягвае Віталій Іванавіч распавядаць гісторыю сякеры і сваёй сям’і. – Як дзеда Рафала не стала, я іх сабе забраў. І яшчэ адна дзедава сякера недзе ёсць, я нават ведаю, у каго – калі яшчэ жывая да гэтага часу. Усё хачу прыдбаць у сваю калекцыю. Спецыяльная такая сякера, склют яе ў нашай мясцовасці называлі. Па выгляду – як секіра ў старажытных стражнікаў. Бярвенні часаць ёй вельмі зручна, для гэтага і прызначана.
Слухае Ксенія дзеда... Сякеры яе, па праўдзе кажучы, не вельмі цікавяць – а вось гісторыя пра прапрадзеда Рафала вельмі нават займальная. Ды яшчэ ў “выкананні” дзеда Віталія, вядомага ва ўсім наваколлі расказчыка…
– А яшчэ ад дзеда Рафала ў мяне засталася старая, таксама нямецкая, грунтвага. Не ведаеце, што гэта такое? – смяецца. – У перакладзе на рускую мову – “уровень”. І бабка – касу кляпаць. Сёння ўжо, напэўна, і не знойдзеш тых, хто ўмее касу кляпаць на вострай бабцы. Ды і на плоскай – мала ўжо спецыялістаў знойдзецца… Але хай застаецца ў гаспадарцы – як дзедаў успамін…
– А вось гэта – сякера майго бацькі, твайго, значыць, дзеда Івана, – працягвае знаёміць унуч¬ку са сваёй калекцыяй Віталій Іванавіч. – Ёй таксама гадкоў нямала. Але яна і сёння ў мяне – асноўная рабочая. Надта ж спрытная сякерка, едкая, паслухмяная. Усё, што трэба па гаспадарцы, раблю ў асноўным ёй.
– А гэтая вось сякера, – бярэ ў рукі яшчэ адну Віталій Іванавіч – і застаецца толькі здзіўляцца, як ён іх адрознівае? – дасталася мне ад цесця, яшчэ аднаго твайго, Ксенія, прадзеда, бацькі Эмы Іосіфаўны, Іосіфа Феонавіча Постнікава. Хоць на радзіме – ён з Украіны на Шчучыншчыну прыехаў – клікалі яго Осіпам, гэта тут перайначылі… А гэты вось калун – равеснік Гудагайскай сярэдняй школы: для кацельні ў першую зіму ім дровы секлі. А потым зламалі і выкінулі. А я падабраў – памятная рэч. Майстры мне яго заварылі, зрабіў тапарышча – хай застаецца памяць, як у школе працаваць пачыналі…
Сякеры трапляюць у калекцыю Віталія Іванавіча рознымі шляхамі. І ў розным стане. Некаторыя трэба рамантаваць – тут ён звяртаецца да майстроў. А вось тапарышчы для кожнай з іх Лянкевіч робіць сам, уласнаручна – яшчэ адно яго захапленне. Пераважна з ясеня – неяк аддалі яму спілаванае дрэва, і ён зараз беражэ каштоўную драўніну. Хоць увогуле Віталій Іванавіч упэўнены, што найлепшы матэрыял для тапарышча – драўніна з пладовых дрэў: яблыні, грушы. Але ж іх без патрэбы не станеш секчы, у іх іншае прызначэнне. Ды нават і па патрэбе…
Смеючыся, Віталій Іванавіч паказвае ў сваёй калекцыі невялікую сякерку:
– А гэта вось Эмы Іосіфаўны інструмент. Яна ім, як мяне дома няма, кусты ў садзе высякае…
– Бо ён жа не дазваляе, – апраўдваецца гаспадыня. – Усё яму патрэбна! І гэтыя вось сякеры – навошта іх, сямнаццаць штук, у гаспадарцы? І ў садзе – кожнае дрэва, кожны кусцік, нават калі яны ўжо радзіць не хочуць…
– Бо й патрэбна! – парыруе Віталій Іванавіч. – У кожнага дрэва і ў кожнага куста на гэтым панадворку – таксама свая гісторыя. Вось гэтае я садзіў, як Дзімка нарадзіўся, гэтае – як Вадзім, а гэтыя яны ўжо самі садзілі… – і далей пацягнуліся такія цікавыя для ўнучкі гісторыі сямейнага жыцця…
Ёсць такая тэорыя, што рэчы, якія мы прывыклі лічыць неадушаўлёнымі, тым не менш маюць сваю душу – кожная з іх! І кожная мае сваю памяць, захоўвае цеплыню ці холад рук, што яе трымалі, ёй карысталіся. І свой характар… Трэба толькі ўмець абудзіць гэтую памяць, адчуць той характар – і тады яны будуць служыць гаспадару верна і ўдзячна многія гады… А калі пачуць, пра што расказваюць рэчы – узбагацішся яшчэ і духоўна.
Думаю, што Ксеніі, дачцэ старэйшага сына Лянкевічаў Дзімы, у гэтым сэнсе вельмі пашанцавала: яна гісторыю свайго роду вывучае не па сухіх архіўных звестках, а па цяпле рук, якое захоўваюць рэчы, якія некалі верай і праўдай служылі яе продкам.
-------------------------
Ніна АЛЯКСЕЕВА, фота аўтара.