Пра ўтрыманне жывёлы на МТК “Беразоўка” летам даведаўся карэспандэнт
07:47 / 04.06.2021
Менавіта на МТК «Беразоўка», дзе ўтрымліваецца найбольш у гаспадарцы – 875 галоў – дойных кароў, мы зазірнулі з першым намеснікам начальніка ўпраўлення сельскай гаспадаркі і харчавання Вольгай Умрыхінай.
КСУП «Варняны»
Малочна-таварныя комплексы «Газа», «Кярняны», «Беразоўка».
Малочна-таварныя фермы «Варняны», «Карвэлі», «Варона».
– У КСУП «Варняны» – крыху больш за 2 300 дойных кароў, з якіх каля 70% ганяюць на пашу, – па дарозе на комплекс уводзіць у справы Вольга Віктараўна. – Пасвяць сухастойных кароў, цёлак. Асабіста ў мяне «Варняны» выклікаюць найбольшую заклапочанасць: надоі і якасць малака тут жадаюць лепшага. На мой погляд, выхад з сітуацыі – пасвіць максімальную колькасць жывёлы. Па-першае, яе не трэба будзе карміць што называецца «з колаў», па-другое, гэта дазволіць аграрыям нарыхтаваць на зіму больш травяністых кармоў. Да таго ж, праменад – гэта і вітамін Д, і прафілактыка захворванняў канечнасцей. А яшчэ, мне здаецца, адна з праблем у КСУП «Варняны» – арганізацыя работы: чалавечы фактар ніхто не адмяняў. У сучасных умовах варта нарошчваць пагалоўе, а не змяншаць. Не будзе буйной рагатай жывёлы – не будзе жыцця ў гаспадарцы.
З Вольгай Умрыхінай нельга не пагадзіцца: пакуль гаспадарка не атрымала новую корманарыхтоўчую тэхніку – нагадаю, праз «Прамагралізінг» аўтапарк КСУП «Варняны» павінен сёлета папоўніцца трактарам, касілкай і корманарыхтоўчым комплексам – тэхнічных магутнасцей у варнянцаў не хопіць, каб карміць жывёлу «зялёнкай» і адначасова нарыхтоўваць сянаж. Сапраўды, адзінае выйсце – паша…
Накіроўваемся ў адзін з кароўнікаў МТК «Беразоўка». Карціна, тыповая для малочна-таварных комплексаў: жывёла есць кармы, якія ўручную падсоўваюць 2 даглядчыкі. На кармавых сталах у рагуль сумесь са здробненых саломы і азімай свірэпіцы.
Начальнік комплекса Міхаіл Бражыцкі
– Навацельныя і высокапрадукцыйныя каровы дадаткова атрымліваюць па 300 грамаў мукі на кілаграм малака. Прэміксаў не даём. У рацыён увялі зялёную масу, – патлумачыў начальнік комплексу.
З першага дня работы комплекса даглядчыкам тут працуе Іван Гражуль.
Жывёлавод Іван Гражуль
Жывёла ў кароўніку выглядае чыстай – значыць, сістэма гноевыдалення працуе спраўна. Па словах памочніка начальніка комплекса Святланы Астроўскай, двойчы на дзень трактар счышчае праходы да стойлаў: гной трапляе ў рэзервуары, адтуль – па каналах у накапляльную ёмістасць.
Памочнік начальніка комплекса Святлана Астроўская
– Вядома, здараюцца праблемы. Напрыклад, з-за моцных дажджоў працякаў дах у памяшканні, дзе ўтрымліваюцца сухастойныя каровы, – працягвае жанчына. – Усё адрамантавалі сваімі сіламі. На пашу выганяем каля 260 галоў – нецеляў і сухастойных кароў. Можна сказаць, што на комплексе яны толькі начуюць.
Да слова сказаць, працоўную дзейнасць Святлана Астроўская пачынала даяркай, як і маці. Потым «дарасла» да памочніка начальніка комплексу: усе нюансы жывёлагадоўлі жанчына засвоіла на практыцы.
Шмат гадоў сельскай гаспадарцы аддалі і цялятніцы Наталля Лакуцэвіч і Алена Пяткевіч, якія з напарніцай утрох даглядаюць каля 500 цялят рознага ўзросту.
Цялятніцы Наталля Лакуцэвіч і Алена Пяткевіч
– Мы запускалі гэты комплекс, – узгадвае Наталля Лакуцэвіч. – Да двух месяцаў цялятак кормім з соскі, потым прывучаем да вядзерца. Акрамя малака, яны атрымліваюць і старцерны камбікорм, а падрослыя бычкі і цялушкі – канцэнтраты і сена.
Слова спецыялісту
На пытанні адказвае галоўны заатэхнік КСУП «Варняны» Сяргей Бразевіч.
– Якія ўмовы ўтрымання жывёлы створаны ў КСУП «Варняны ? З якімі праблемамі сутыкаюцца жывёлаводы?
– Лічу, што для ўтрымання жывёлы на комплексах і фермах створаны нармальныя ўмовы: пастаянна падсцілаюць, своечасова выдаляецца гной.
– Чаму тады ў КСУП «Варняны» нізкія надоі?
– Тры гады запар мы не маглі пад патрэбу нарыхтаваць грубых кармоў, не хапала канцэнтратаў – мука ў асноўным ішла на патрэбы свінагадоўлі. Маладняк менш ад патрэбы атрымліваў канцэнтратаў. Пасля закрыцця свінакомплексу ўсе канцэнтраваныя кармы будуць выкарыстоўвацца для кармлення буйной рагатай жывёлы. Спадзяёмся, што, атрымаўшы новую тэхніку, мы зможам назапасіць патрэбную колькасць травяністых кармоў.
Подписывайтесь на телеграм-канал «Островецкая правда» по короткой ссылке https://t.me/ostrovetsby.
Телеграм-канал «Островецкая правда» – всё самое интересное из жизни Островца и Островецкого района.
Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.
Телеграм-канал «Гродно Медиа Group» – это ежедневные новости районов Гродненской области и города Гродно.