Пра ўрокі Чарнобыля гаварылі ўдзельнікі ліквідацыі яе наступстваў
15:16 / 30.04.2021
Адказы на гэтыя пытанні маладыя людзі спрабавалі знайсці не толькі ў дакументальным фільме «Звон Чарнобыля» і інфармацыі, якую прадаставілі вядучыя, але і ва ўспамінах непасрэдных удзельнікаў тых падзей.
Падпалкоўнік міліцыі ў адстаўцы Сяргей Шэін у 1986 годзе быў камісарам зводнага рэспубліканскага атрада супрацоўнікаў органаў унутраных спраў, якія ахоўвалі адселеныя тэрыторыі.
– Я схіляю галаву перад мужнасцю пажарных, ваенных будаўнікоў, хімікаў, якія цаной свайго здароўя і жыцця ўратавалі свет ад магчымай ядзернай катастрофы, – сказаў Сяргей Віктаравіч. – Нашы міліцыянеры хоць і не тушылі рэактар, але ўнеслі свой уклад у ліквідацыю наступстваў аварыі.
Сяргей Шэін расказаў, як ішло фарміраванне атрада – да гонару астравецкіх міліцыянераў, ніхто з іх не сказаў: «Не паеду, гэта небяспечна» – усе 11 чалавек, якія ў розны час атрымалі загад выехаць у Гомельскую вобласць, выканалі яго адказна і дакладна. Хоць тады мала хто разумеў, якую небяспеку нясе ў сабе нябачны вораг – радыяцыя, чым могуць абярнуцца для здароўя некалькі тыдняў, праведзеных у зоне адсялення, не ведаў, якія дозы апраменьвання яны назапасілі за час знаходжання ў гэтай камандзіроўцы, і тым больш не думалі пра будучыя льготы і ўзнагароды – яны проста выконвалі свой абавязак.
Старшыня раённага Савета дэпутатаў Ірына Тальчук у час, калі адбылася Чарнобыльская аварыя, жыла ў Хойніках, знаходзілася ў дэкрэтным адпачынку – толькі нарадзіла дачушку. Трывога, страх за будучыню дзіцяці прымусілі яе, як і дзясяткі, сотні іншых сямей, змяніць месца жыхарства на ўтульны і, галоўнае, чысты ад радыеактыўных выкідаў Астравец.
– Мясцовыя людзі нас, перасяленцаў, добра прынялі, дапамаглі, чым маглі. Тыя, хто хацеў, знайшлі магчымасці для самарэалізацыі. Мне грэх скардзіцца на лёс – і ўсё ж да гэтага часу мучыць сумленне, што так мала зрабіла для сваёй малой радзімы, – шчыра прызналася Ірына Эдуардаўна.
Старшыня раённага Савета расказала пра дзяржаўную падтрымку людзей і тэрыторый, якія пацярпелі ў выніку Чарнобыльскай аварыі, – на гэта па-ранейшаму выдзяляюцца немалыя сродкі.
Намеснік начальніка Астравецкага РАУС Вадзім Савіцкі ад імя афіцэрскага сходу аддзела ўручыў каштоўныя падарункі ветэранам міліцыі Сяргею Шэіну, Івану Ярашэвічу і Івану Мацкойцю, якія прымалі ўдзел у ліквідацыі наступстваў аварыі на Чарнобыльскай АЭС, – гэта толькі невялікая ўдзячнасць сучаснікаў за самаахвярную бездакорную службу.
Сяргей Шэін і Ірына Тальчук былі аднадушны: пра Чарнобыль трэба помніць і ведаць як мага больш, каб не дапусціць падобнага ў будучым. Так, Беларуская атамная электрастанцыя зусім іншага тыпу, чым была ў Чарнобылі, яна аснашчана некалькімі ступенямі аховы – але бяспечная работа самага разумнага і дасканалага абсталявання залежыць ад адказнасці і прафесіяналізму людзей, якія з ім працуюць. Думаецца, гэтая сустрэча дапамагла моладзі, якая прысутнічала ў зале, не толькі атрымаць новую інфармацыю, але і зразумець, якой бядой можа стаць любое дасягненне цывілізацыі, калі забыцца на меры перасцярогі.
Подписывайтесь на телеграм-канал «Островецкая правда» по короткой ссылке https://t.me/ostrovetsby.
Телеграм-канал «Островецкая правда» – всё самое интересное из жизни Островца и Островецкого района.
Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.
Телеграм-канал «Гродно Медиа Group» – это ежедневные новости районов Гродненской области и города Гродно.
