Как не «подцепить» простуду, лайфхаками делятся островчане
12:43 / 13.12.2019
Марыя Русецкая, індывідуальны прадпрымальнік:
– Мне па душы народныя сродкі, але яны дзейсныя толькі ў пачатку захворвання. Пры першых сімптомах прастуды абавязкова п‘ю чай з лімонам і імбіром, які добра сагравае. Калі няма тэмпературы, можна папарыць ногі ці рукі. Не варта забываць і пра такія скарбніцы вітамінаў, як цыбуля і часнок, – яны знішчаюць многія хваробатворныя мікробы. Аднак калі самаадчуванне не паляпшаецца, не займайцеся самалячэннем, а звярніцеся да ўрача.
Ніна Жыхар, фармацэўт:
– Самае галоўнае – прафілактыка. Не мной прыдумана, што лягчэй і, да слова, танней папярэдзіць хваробу, чым потым яе лячыць. Правілы, якіх варта прытрымлівацца падчас найбольшай актыўнасці вірусаў, вельмі простыя: збалансавана харчуйцеся, часцей мыйце рукі, спіце не менш за восем гадзін у суткі, выконвайце фізічныя практыкаванні ці замяніце іх на пешыя прагулкі і абавязкова ўмацоўвайце імунітэт вітамінамі. Не займайцеся самалячэннем і не прымайце антыбіётыкі без прызначэння ўрача – вы можаце нашкодзіць сабе і свайму арганізму.
Святлана Чарняўская, пенсіянерка:
– Лепш за ўсё прышчапляцца ад грыпу. Знаёмая робіць прышчэпку кожны сезон – і ніводнага разу за апошнія дзесяць гадоў не хварэла. Пры прастудзе дапамогуць рэцэпты, якімі карысталіся яшчэ нашы бабулі: цёплы – толькі не гарачы! – чай з лімонам ці малінавым варэннем і пасцельны рэжым за некалькі дзён падымуць на ногі любога. А лепш – будзьце здаровымі і не хварэйце!
Наталля Шукевіч, беспрацоўная:
– Правіла нумар адзін, якое няўхільна выконваецца дома ўсімі членамі нашай сям’і, – гэта мыццё рук не толькі перад абедам, але і пасля вуліцы. Каб не захварэць, трэба абмежаваць кантакты з хворымі. А вось праменад будзе не лішнім – трэба толькі апранацца па надвор’і.
Вольга Фалевіч, спецыяліст па аказанні банкаўскіх рознічных паслуг (без фота):
– Галоўная зброя супраць прастуды і грыпу – наша імунная сістэма. Для агульнага ўмацавання арганізму можна прапіць курс вітамінаў. У гэты перыяд важна апранацца па сезоне. Гэта правіла тычыцца і абутку –
ногі павінны быць у цяпле і не намакаць.