Посещают ли островчане культурные мероприятия
14:48 / 12.10.2019
Таццяна Кучэўская, намеснік дырэктара:
– Калі ёсць вольны час, я заўсёды імкнуся кудысьці выбрацца. Апошняе мерапрыемства, якое наведала, – гэта канцэрт «Дискотека 80-х». Было цікава, жыва і весела. Яркія ўражанні пакінула музычная камедыя «Свадьба в стиле ретро» – таленавітыя прафесійныя акцёры, пастаноўка з глыбокім сэнсам. Яшчэ запомніўся філасофскі спектакль «Дзед». Асабіста мне падабаецца бываць у Рымдзюнах. У загадчыцы аддзела культуры і вольнага часу аграгарадка Гервяты Наталлі Бялячыц атрымліваецца стварыць настолькі цёплую і ўтульную атмасферу, што любое мерапрыемства там праходзіць на «ўра». Лічу, што культурнае жыццё нашага раёна насычанае і разнастайнае. Было б, як кажуць, жаданне – і мерапрыемства знойдзецца па душы.
Людміла Сівец, прадавец:
– На жаль, у мяне не так шмат вольнага часу, каб наведваць культурныя мерапрыемствы. Пасля работы хочацца зрабіць нешта дома. Праўда, можна лічыць, штогод удзельнічаю ў святкаванні 9 Мая і Дня Незалежнасці, якое па традыцыі праходзіць у лесапарку, – працую на выязным гандлі. Паглядзець канцэрт няма як, затое атрымліваецца паслухаць выступленні артыстаў.
Антон Блашкевіч, вучань:
– Аднойчы з класам ездзілі ў Мінск у тэатр. Ужо нават і не ўспомню, якую глядзелі пастаноўку, але, калі шчыра, мне не спадабалася. На канцэрты не хаджу – не мой гэта фармат. Як праводжу вольны час? У тэлефоне ці ў камп’ютары – цяпер усё можна знайсці ў інтэрнэце: і музыку паслухаць, і спектакль паглядзець.
Юлія Бруйко, педагог-арганізатар:
– Канешне, наведваю! Я працую педагогам-арганізатарам, таму з валанцёрскім атрадам мы заўсёднікі розных мерапрыемстваў. Цесна супрацоўнічаем з райкамам БРСМ: ладзім сумесныя акцыі, дапамагаем пажылым людзям. Разам з валанцёрамі былі на дабрачынным канцэрце, арганізаваным у падтрымку маленькага земляка Марка Гарбачова.
Наталля Кізіна, повар:
– У Астравец я пераехала чатыры месяцы таму з Мінскай вобласці. На жаль, пакуль нідзе не бывала. У сацыяльных сетках сачу за культурным жыццём сталіцы – яно там насычанае і разнастайнае.