У Міхалішках падвялі вынікі творчага года

14:52 / 13.02.2019

Што напрацавалі мясцовыя артысты ў мінулым годзе, ці не забылі любімыя гледачамі песні і мініяцюры, што новенькага з’явілася ў іх рэпертуары, ці запаліліся на міхалішкаўскім небасхіле новыя зорачкі – гэта высвятлялі жыхары аграгарадка Міхалішкі, якія прыйшлі на канцэрт у мясцовы Дом культуры.

Вядучыя задалі канцэрту жартаўлівы тон, які падтрымаў песнямі «Сівы конь» і «Ой, у зялёненькім садочку» ансамбль народнай песні «Вілія». Удзельнікі гэтага гурта не толькі прыгожа спявалі, але і ўдала пажартавалі з мужчынскіх і жаночых слабасцяў, прачытаўшы вясёлыя байкі.

Пацешылі міхалішкаўцаў вакальны гурт «Скарбніца», Аліна Якель, Яна Стасяловіч, Паліна Ярмак.
Заўсёды з зачараваннем слухаю выступленні Надзеі Вайцяховіч і Юліі Якель – думаю, не толькі я. На гэты раз іх дуэт падарыў цудоўную песню «Цвіце бэз» – чыстае двухгалоссе не пакінула нікога раўнадушным. Як і сольнае выкананне Надзеяй песні «Раскажыце, птушкі»: мабыць, сама Пугачова, каб пачула, як спявае наша зямлячка, засталася б у захапленні.

Цудоўнае выкананне маці і дачкой Ганнай і Ірынай Часнойцямі песень розных гадоў скарыла гледачоў – гэта пацвердзілі доўгія шчырыя апладысменты.
Кожны раз на падобных канцэртах мы знаёмімся з новымі выканаўцамі. Квінтэт у складзе Ганны Трафімчык, Людмілы Лаздоўскай, Таццяны Бабіч, Наталлі Ярмак і Надзеі Вайцяховіч з песняй «Льецца музыка» сарваў шквал апладысментаў.

Гледачы ў зале былі рознага ўзросту – і кожнае пакаленне пачула знаёмыя песні свайго часу. Таму дзве гадзіны праляцелі незаўважна.

Ірына ЯХІМОВІЧ, аг. Міхалішкі.