Прызёр рэспубліканскага конкурсу “Жывая класіка” Іван Баракаў жыве ў Астраўцы

14:41 / 14.09.2018
1763

Гімназіст Іван Баракаў стаў прызёрам рэспубліканскага конкурсу “Жывая класіка”, які прайшоў падчас Дня беларускага пісьменства і друку ў Іванаве.

zhivaya_klassika_23.jpg

Пасля перамогі ў раённым этапе Іван трапіў на абласны конкурс, дзе таксама стаў лепшым у сваёй узроставай катэгорыі.

Потым быў удзел у рэспубліканскіх паўфінале і фінале – за час усіх этапаў конкурсу яго ўдзельнікамі сталі звыш 15 тысяч юных талентаў з усёй краіны.

А ў Дзень беларускага пісьменства і друку 12 лепшых чытальнікаў з усёй краіны сустрэліся на фінале рэспубліканскага конкурсу “Жывая класіка”.

– Для дзяцей гэта быў карысны вопыт, – расказала маці астравецкага фіналіста Галіна Сяргееўна Баракава. – Паслухаць творы ў выкананні сваіх аднагодкаў і старэйшых школьнікаў, павучыцца трымацца на сцэне і атрымаць падарункі і ўзнагароды з рук намесніка міністра інфармацыі Ігара Бузоўскага – неперадавальныя пачуцці.

orig_Barakov_Ivan.jpg

Пяцікласнік Іван Баракаў за выкананне замалёўкі “Васількі”, напісанай яго маці, настаўніцай пачатковых класаў гімназіі №1 Галінай Сяргееўнай Баракавай і прысвечанай памяці прадзядулі і ўсіх, хто загінуў у гады Вялікай Айчыннай вайны, быў узнагароджаны Дыпломам 3 ступені і пуцёўкай у дзіцячы аздараўленчы цэнтр “Зубраня”.

У планах таленавітага хлопчыка і яго маці ўдзел у гэтым жа конкурсе ў наступным годзе.

– Асноўная прычына таго, што мы не занялі першае месца, крыецца ў выбары твора. Па ўмовах конкурсу яго ўдзельнікі павінны чытаць класічныя творы, таму на наступны год абавязкова падрыхтуемся і пастараемся заявіць пра сябе, – расказалі Іван і Галіна Сяргееўна Баракавы.

Віншуем юнага астраўчаніна з перамогай! Так трымаць!

 

Текст: Елена Ярошевич
Фото: з архіва сям’і Баракавых, ctv.by
Оставить комментарий
Текст сообщения*
Защита от автоматических сообщений