Пасяўная кампанія ў КСУП “Варняны”
13:05 / 07.05.2018
Напачатку тыдня мы наведалі КСУП «Варняны», каб даведацца, як тут праходзіць пасяўная кампанія.
– Адны з апошніх завяршылі сяўбу збожжавых. Прычын некалькі: па-першае – у КСУП «Варняны» самая вялікая ў раёне плошча іх вырошчвання – а гэта 2 750 гектараў; па-другое – не хапіла свайго насення, – расказвае галоўны аграном Аляксандр Іванавіч Герасім. – Дзякаваць богу, пытанне з насенным матэрыялам вырашана.
Акрамя гэтага, варнянцы перасеялі 50 гектараў азімага рапсу, які загінуў.
Для галоўнага агранома Аляксандра Герасіма зараз напружаная пара
Структура вырошчвання збожжавых у КСУП «Варняны» сёлета значна не змянілася: праўда, пасеялі на 100 гектараў менш аўсу, затое пад пшаніцай плошча на столькі ж пабольшала. Бульбу ў гаспадарцы ў гэтым годзе садзяць толькі насельніцтву, на патрэбы сталовай пад «другі хлеб» выдзелілі 3 гектары.У КСУП «Варняны», як і ў іншых гаспадарках раёна, цалкам завяршылі сяўбу цукровых буракоў. Насенне цукровікаў варнянцы прыгарнулі ў глебу на плошчы 300 гектараў. У цэлым па раёне пад гэтыя салодкія караняплоды адведзена 1 620 гектараў.
На сяўбе ў гаспадарцы сёлета задзейнічаны чатыры энерганасычаныя трактары і адна СПУ-шка.
Валерый Дзенюш, як і кожны год, сее збожжа
– У гаспадарцы тэхніка даўно не абнаўлялася, але не ў гэтым асноўная праблема. Не хапае механізатараў. За пяць гадоў, што я тут працую, у «Варнянах» чалавек на трыццаць стала менш трактарыстаў. Хочацца верыць, што з новым кіраўніцтвам кадравая праблема ўрэшце вырашыцца, – прызнаецца галоўны аграном. – На пасяўной працавалі адказныя, сумленныя людзі – дзякуючы ім і адсеяліся.Па словах Аляксандра Іванавіча, на сяўбе механізатары працуюць з 7 раніцы да 8 вечара, яшчэ дзве гадзіны – запраўляюцца.
На парадку дня варнянскіх сейбітаў – кукуруза. Пад яе адведзена 1 250 гектараў, з якіх 50 – на зерне. Зерне гэтай «цеплалюбівіцы» ўжо апладніла 150 гектараў (12 працэнтаў ад плану). Сваёй чаргі дачакалася і грачыха.
Іван Яновіч на «лейцы» ўносіць калійныя ўгнаенні
Цікаўлюся ў галоўнага агранома прагнозам на будучы ўраджай.
– Няўдзячнае гэта справа – прагнозы, – гаворыць Аляксандр Іванавіч. – Але ўраджайнасць збожжавых сёлета на 5-7 цэнтнераў будзе вышэйшая, чым летась, – за кошт зяблевай апрацоўкі глебы: пазалетась толькі 15 працэнтаў падрыхтавалі, у мінулым годзе – усю.
Генадзь Валанцэвіч адзін з самых вопытных сейбітаў у гаспадарцы