Клопат вяскоўцаў: пасадзіць соткі
09:37 / 07.05.2018
У КСУП «Варняны» актыўна садзяць «людскую» бульбу.
На полі паміж вёскамі Кярняны і Варняны невялікая чырвоная саджалка «наразала» барозны. Чарга – каму за кім – ужо была размеркавана. Людзі засыпалі ў саджалку сваю бульбу, а пасля яе высадкі зазначалі свае рады драўлянымі калкамі.
– Пад соткі ў палях севазвароту сёлета выдзелілі 80 гектараў, – расказвае галоўны аграном КСУП «Варняны» Аляксандр Іванавіч Герасім. – Участкі пад «людскую» бульбу выдзялялі каля вёсак. Ну, падумаеш, «адшчыпнуў» я лапік зямлі ад кукурузы – але людзям зручней, калі бульба расце ля вёскі.
У КСУП «Варняны» садзяць бульбу ўсім жадаючым. Праўда, насенне павінна быць сваё, а ўсё астатняе – падвоз клубняў на поле, пасадка бульбы, акучванне барознаў і хімічная апрацоўка ад шкоднікаў – закладзены ў кошт «соткі».
Памочнік брыгадзіра Вікторыя Кяжун
Механізатар Баляслаў Баляслававіч Ігнатовіч, які на саджалцы спрытна наразаў барозны, расказаў, што за дзень у сярэднім засаджваюць 3-4 гектары. На адну сотку патрэбен прыблізна мех бульбы.
Баляслаў Ігнатовіч на саджалцы «наразае» людзям соткі
Кантроль за пасадкай бульбы – прынамсі, у дзень нашага візіту на варнянскае поле – ускладзены на памочніка брыгадзіра.– Усё жыццё бяру «соткі» ў калгасе, – прызнаецца жыхар Варнян Войцех Баляслававіч Гражуль. – Ля хаты з жонкай таксама пасадзілі бульбу, але толькі два шнурочкі. Тут узялі 15 сотак. Заплаціў – і клопатаў не ведай: глебу падрыхтуюць, пасадзяць бульбу, апрацуюць ад пустазелля і шкоднікаў, акучаць, а восенню яшчэ і выкапаюць. Любата!
Войцех Гражуль штогод садзіць бульбу на калгасным полі