Рукі Элы Козіч пахнуць прыгажосцю

16:25 / 11.03.2018

Да яе спяшаюцца ў будні і выхадныя, ранкам, днём і вечарам дзяўчынкі і жанчыны, хлопчыкі і мужчыны, каб быць прыгожа прычасанымі, падстрыжанымі, а можа, і змяніць вобраз.

І па-іншаму быць не можа ў цырульніка, які амаль трыццаць гадоў не здраджвае любімай справе.

Пачынала жанчына адточваць сваё прафесійнае майстэрства ў астравецкім Доме быту, а потым разам з калегай адкрыла сваю справу – цырульню «ЭллАнна».
– Калі тое, чым займаешся, падабаецца, то можна працаваць, не зважаючы на час і стомленасць, – гаворыць Эла. – Бывае, што і па дванаццаць гадзін у суткі даводзіцца адстаяць ля рабочага крэсла – калі людзі просяць, я не магу адмовіць.

– За столькі гадоў работы навучылася ўжо нават адгадваць пажаданні кліентаў, – гаворыць цырульнік.

– У Элы вельмі мяккія рукі, – уключаецца ў нашу з цырульнікам размову кліентка, над валасамі якой у гэты час «чаравала» жанчына. – Можна сказаць, атрымліваеш адразу дзве паслугі: і прычоску, і рэлаксацыю.

Эла робіць прыгожымі жанчын і мужчын, многія з якіх, дарэчы, давяраюць толькі ёй. А вось над прычоскай самой Элы «чаруюць» яе калегі – па словах майстра, сам сабе ідэальна не зробіш ні ўкладку, ні афарбоўку – хіба толькі грыўку падстрыгчы можна.

Праца цырульніка – гэта не проста адладжаныя рухі, умелае валоданне інструментам і веданне працэсу стрыжкі, афарбоўкі, укладкі. Гэта пастаяннае развіццё: мода мяняецца, а разам з ёй – і пажаданні кліентаў.

Яшчэ гэта творчасць і мастацкае бачанне, дзякуючы якім майстар стварае асаблівы, адзіны і непаўторны вобраз кліента.