Як на Астравеччыне рыхтуюцца да вясенне-палявых работ
11:24 / 28.02.2018
Пракаменціраваць падрыхтоўку гаспадарак раёна да вясенне-палявых работ і пасяўной кампаніі мы папрасілі спецыялістаў упраўлення сельскай гаспадаркі і харчавання Астравецкага райвыканкама.
Вячаслаў Фёдаравіч Яроміч, галоўны спецыяліст аддзела арганізацыі вытворчасці:
Падрыхтоўка тэхнікі да сяўбы і вясенне-палявых работ, на мой погляд, у цэлым праходзіць арганізавана і зладжана. На раённым узроўні зацверджаны графікі рамонту сельскагаспадарчай тэхнікі.
Па стане на 22 лютага гатоўнасць плугоў складае 75%, культыватараў – 72%, камбінаваных глебаапрацоўчых агрэгатаў – 70%, пасяўных агрэгатаў – 63%, сеялак збожжа – 79%, сеялак кукурузы і цукровых буракоў – 64%.
Амаль усе гаспадаркі маюць па два-тры камбінаваныя глебаапрацоўчыя пасяўныя агрэгаты, якія хоць заўтра могуць выйсці ў поле. На лінейцы гатоўнасці – культыватары, плугі, АКШ, дыскавыя бароны і іншая тэхніка. Значныя сумы яшчэ трэба ўкласці ў рамонт трактараў, асабліва ў КСУП «Варняны» і РУП «Астравецкі саўгас «Падольскі».
КСУП «Гудагай» і «Гервяты» сёлета набываюць запчасткі за свой кошт. КСУП «Варняны», «Міхалішкі» і РУП «Астравецкі саўгас «Падольскі» адзін раз у месяц аднадзённую выручку ад рэалізацыі малака накіроўваюць на набыццё запчастак – «набягае» каля 32-38 тысяч рублёў.
Сумесна з унітарным прадпрыемствам «Астравецкі райагразаб» яшчэ з восені 2017 года праведзена «дэфектоўка» сельскагаспадарчай тэхнікі. Ужо з канца мінулага года пакрысе праз Астравецкі райагразаб мы пачалі набываць запчасткі, што дазволіла зэканоміць каля 40-50 тысяч рублёў. Да параўнання: цэны на некаторыя запчасткі былі ў паўтара-два разы меншыя, чым цяпер.
Гаручазмазачныя матэрыялы і паліва гаспадаркі будуць набываць за ўласныя сродкі, за кошт будучага ўраджаю і адкрыцця крэдытных ліній.
Веру, што пасяўная кампанія пройдзе зладжана і ў кароткія тэрміны, што дазволіць нам атрымаць высокі ўраджай збожжавых і нарыхтаваць дастаткова кармоў.
Віктар Багданавіч Чума, загадчык сектара раслінаводства:
– Па стане на 22 лютага разам са страхавым фондам пад ураджай 2018 года ў раёне засыпана 2 829,4 тоны насення, з іх – 2 498 тоны кандыцыйнага насення збожжавых і зернебабовых, што складае 94% ад патрэбы. Цалкам забяспечаны насеннем толькі дзве гаспадаркі: КСУП «Гудагай» – 146% і КСУП «Гервяты» – 111%. Не маюць пад патрэбу кандыцыйнага насення КСУП «Міхалішкі (89%), РУП «Астравецкі саўгас «Падольскі» (87%) і КСУП «Варняны (58%).
Такая сітуацыя склалася з-за пралікаў агранамічных службаў вышэй узгаданых гаспадарак падчас уборачнай кампаніі: насенныя пасевы трэба было прасушыць і ачысціць у першую чаргу, каб насенне не страціла ўсхожасці – а гэта зрабілі не ўсе.
Збожжавыя культуры засыпаны высокаўраджайнымі сартамі, якія ўнесены ў дзяржаўны рэестр, – яравая пшаніца «Дар’я», «Рассвет», «Васіліса», «Кватра», «Бамбона»; ячмень «Радзіміч», «Бровар», «Фэст», «Бацька»; авёс «Лідзія», «Золак». У глебу трапіць насенне, галоўным чынам, суперэліты, эліты, першай і другой рэпрадукцыі.
Вытворчасцю бульбы ў раёне займаюцца КСУП «Гудагай» і «Гервяты». У гэтых гаспадарках засыпана 890 тон насення бульбы (145% да плану): 459 тон сорту «Брыз», 322 тоны сорту «Маніфест», 60 тон сорту «Вектар» і 49 тон сорту «Янка». У 2018 годзе на пасадачныя мэты будуць выкарыстаны клубні не ніжэй другой рэпрадукцыі.
Сёлета гаспадаркам раёна неабходна пасеяць шматгадовыя травы на плошчы 2 560 гектараў і перазалужыць 3 145 гектараў сенажацей. Для гэтага засыпана 79 тон насення шматгадовых траў, што складае 143% ад патрэбы. Пры гэтым толькі крыху больш за палову насення – кандыцыйнае. РУП «Астравецкі саўгас «Падольскі» не мае кандыцыйнага насення шматгадовых траў – яно знаходзіцца на праверцы. У астатніх гаспадарках насенне дапрацоўваецца на ТДА «Насенне траў» і ААТ «Ліда-лён». Плануем набыць 14 тон насення люцэрны, 5 тон канюшыны і 10 тон райграса аднагадовага.
У параўнанні з мінулым годам на 28% больш назапашана мінеральных угнаенняў: пад яравую сяўбу ў раёне падрыхтавана 5 222,2 тоны мінеральных тукаў (54% да патрэбы). Азоту набыта 2 753 тон дзеючага рэчыва (65%), фосфару – 266 (16%), калію – 2 204 (59%). Мінеральнымі ўгнаеннямі лепш за іншых забяспечаны КСУП «Гудагай» (92%).
Збожжавыя і зернебабовыя сёлета зоймуць 18,5 тысяч гектараў. У структуры збожжавых амаль палова плошчаў будзе адведзена пад ячмень і трыцікале – жывёлагадоўлю трэба забяспечыць канцэнтраванымі кармамі. Адна з асноўных задач, якая стаіць сёлета перад аграрыямі, – нарыхтаваць травяністыя кармы, таму плошча пад кукурузай сёлета зменшыцца на 600 гектараў, а вось плошча пад аднагадовымі травамі, наадварот, павялічыцца – у паўтара разы. Прамежкавыя культуры сёлета будуць пасеяны на 1,7 тысяч гектарах.
На маю думку, для зімоўкі азімых збожжавых і рапсу сёлета дастаткова добрае надвор’е.
Спадзяюся, што і ў далейшым надвор’е не падкіне нам сюрпрызаў – і азімыя нас парадуюць сакавітай зелянінай.
